紅磡冰室 (已結業)

中午的红冰，依旧多人。虽然环境较为迫夹，但无阻我哋一齐食好西。猪扒捞公仔面：超水准！瑞士汁公仔面，al dante，有咬口但唔系烂溶溶嘅公仔面，瑞士汁甜甜地，但唔会过咸，香味浓郁，好好味。猪扒好淋，但系唔系煎到干晒果种，仲系有肉汁嘅，相当juicy，最紧要系无渣。总括嚟讲，块猪扒几靓同埋火候啱啱好。炒蛋同埋蒜蓉多士：【由于太肚饿嘅关系，唔记得咗影相，so sorry !】炒蛋：好creamy，应该落咗唔少牛油炒，闻落好重奶油嘅味道，同埋食落好dense，有少少肥腻，但系好食嘅。蒜蓉多士：同坊间嘅茶餐厅唔同，呢度嘅蒜蓉多士系用上厚多士，大约有三块方包嘅厚度。蒜蓉酱捞埋牛油一齐搽上块面包上面，但系口味偏向大众化，蒜蓉唔够多，辣味不足，但尚可接受。唯一要批评嘅系多士烘得唔够脆，失去多士应有嘅风味。跟餐包热饮，我拣咗热鸳鸯，咖啡同埋奶茶嘅比例合适，最紧要嘅系淡奶落得足够，唔似某啲连锁快餐店嘅鸳鸯一样，为咗悭钱，喺奶茶咖啡鸳鸯等等嘅热饮减少淡奶嘅份量，影响品质味道。但总括而言，$44蚊嘅午餐，喺红磡区嚟讲，系物有所值。