癡膠雞 (軒尼詩道)

营业中

休息中

好耐之前已经试过痴胶鸡嘅太子店，印象中食物质素都唔错，最近发现原来佢喺湾仔都有分店，今日就一于拉埋个最识得滋阴养生嘅朋友一齐嚟试吓呢间痴胶鸡。招牌菜就当然唔少得花胶鸡汤米线，而呢度仲有好多小食可供选择。我就比较简单，一于试佢嘅招牌花胶鸡米线，花胶鸡汤呈奶白色，汤底非常鲜甜，仲有好多花胶同鸡件喺面，呢个价钱真系非常超值。朋友就最钟意滋补，佢话要有咁补得咁补，所以拣咗药膳黄酒花胶鸡米线，呢个加入咗药膳黄酒，所以带点微微嘅酒香，仲有虫草花同黑木耳，绝对系养生自选。我钟意佢呢度有好多唔同嘅小食选择，所以都叫咗几款小食开心share。首先拣咗黑椒薯仔牛柳粒，佢嘅调味相当之出色，有黑椒味之余仲带点甜甜嘅蜜糖味，而且份量都唔少，如果唔系已经叫咗米线的话，我真系会举手要多碗白饭。金砖豆腐系其中一道我成日都会叫嘅菜式，而呢度嘅金砖豆腐制作都唔错，外皮薄而脆，入面嘅豆腐非常滑而有豆香，调味亦恰到好处，绝对值得推介！而呢个明太子酿鸡翼就啖啖肉，不过我都系钟意佢哋其他小食多啲。食咗咁多肉，当然要叫返个蔬菜类，手拍青瓜够清爽，可以中和炸物嘅油腻感。饮品有跟餐㗎，咸柠梳打同柚子蜜都只系$18，饮完梳打真系透心凉。