影片
更多
2024-09-26
7233 浏览
Bookmark咗接近1年，全因小贪心，想趁生日去食，可以获赠蛋糕吖嘛~订位要喺2个月前进行，虽然到访时系平日下午，但食客唔少，几乎满座，所以尽早订位系必须。另外，订位入座时间系每15分钟一轮，我同狗狗爸爸早到，幸好上一轮有食客已离开，餐厅先可以安排我哋喺5分钟内入座，否则就要直接等到订座时间。我哋点咗3道菜午餐，一肉一素。侍应话2个人要食相同数量菜式，应该系要达到上菜时的一致性。首先上台系酸种面包，小小原个面包，一开四，配以椰子油制的软身素牛油。面包可追加。第一次送上的面包虽然好食但唔暖，所以外层过硬。牛油的咸味突出，食耐咗或食得多，会感觉略咸，而优点系佢非常软身，一搽即刻会化成半液态的油，流入酸种面包的孔洞，令成块包充满油脂，好可口！我哋喺用餐期间追加咗一次，第二次送上的面包烘得够暖，外层冇咁硬，趁热食就更加食到面包外脆内软的口感。追加面包时，第一次用过的牛油有剩，但侍应表示要收走，再俾过一件新牛油，显示出餐厅对食物的完整性或presentation好有要求，但咁好味的素牛油（略咸系后期先有感既），哪怕系食剩，就咁丢咗有啲浪费。上三道菜之前会有4道开胃菜，包括紫稣叶雪芭、kambu
订位要喺2个月前进行，虽然到访时系平日下午，但食客唔少，几乎满座，所以尽早订位系必须。另外，订位入座时间系每15分钟一轮，我同狗狗爸爸早到，幸好上一轮有食客已离开，餐厅先可以安排我哋喺5分钟内入座，否则就要直接等到订座时间。
我哋点咗3道菜午餐，一肉一素。侍应话2个人要食相同数量菜式，应该系要达到上菜时的一致性。
首先上台系酸种面包，小小原个面包，一开四，配以椰子油制的软身素牛油。面包可追加。第一次送上的面包虽然好食但唔暖，所以外层过硬。牛油的咸味突出，食耐咗或食得多，会感觉略咸，而优点系佢非常软身，一搽即刻会化成半液态的油，流入酸种面包的孔洞，令成块包充满油脂，好可口！我哋喺用餐期间追加咗一次，第二次送上的面包烘得够暖，外层冇咁硬，趁热食就更加食到面包外脆内软的口感。追加面包时，第一次用过的牛油有剩，但侍应表示要收走，再俾过一件新牛油，显示出餐厅对食物的完整性或presentation好有要求，但咁好味的素牛油（略咸系后期先有感既），哪怕系食剩，就咁丢咗有啲浪费。
上三道菜之前会有4道开胃菜，包括紫稣叶雪芭、kambucha 汤、大豆布甸（？）以及红菜头棒棒糖。侍应一次过上4样食物，不过「挞Q」，其中一枝棒棒糖喺不为意下「训」低咗，要拎番入厨房。
紫稣叶雪芭：手指公的指甲大小，紫稣叶味浓，但太细粒，食感只停留好短时间，印象唔深刻
Kambucha汤：一汤匙份量，带柠檬味，酸咪咪（都几酸），几开胃
大豆布甸：非常好食！分3层，上面系碎蕃茄、红甜椒，味道特别又有层次，中间好似系以由豆奶制成的布甸，豆味浓，下层唔记得系乜，呈淡黄色，估计系蔬菜汤啫喱
红菜头棒棒糖：有少少食不出所以然，味淡，似一件由红菜头同其他淡味食材搓成的小波波，波波上的2件瓣，其中一件系姜味饼干
（前菜）蕃茄杂莓大豆慕丝：慕丝同开胃菜果个类似；酱汁带蕃茄酸，配搭以黄豆制成的慕丝/布甸，唔太适合，因为一酸（颇酸）一淡，对比过大，酸味遮盖晒豆制品的独特味道（豆味我系钟意既），所以我冇捞埋食，亦唔喜欢个酱汁
（主菜）杂菌雅枝竹：主角系雅枝竹，酱太浓及过䶢；雅枝竹系我几钟意的食材，但餐厅的煮法唔系特别出色，一般水平；杂菌冇特别；由于个酱我唔识睇欣赏，所以喺食主菜的食材时冇点嚟食，到最后唔想浪费，用面包醮啲酱嚟清碟
65%可可慕丝：慕丝下面有类似青柠味的酱，狗狗爸爸唔太喜欢，觉得既然系甜品，整到咁酸，食味麻麻；我觉得都ok，或者个酱系用嚟消滞，但侧边果两小角牛油果就唔知为乜；慕丝上的几片薄片带咖啡味，而呢个甜品原本配咖啡雪糕，但狗狗爸爸唔饮咖啡，所以我哋改咗大豆雪芭，而味道上就唔系好食得出黄豆味；可可慕丝的甜度合适，但佢唔系好够可可味，冇黑朱古力的甘苦，所以整体一般；味道虽然系复杂，但所有食材唔系好夹或好食
花生酱班㦸椰子雪芭（？）：唔肯定有咩食材，但记得有椰粒/椰子碎；花生酱浓，有花生碎粒，几好食；班㦸/crepe垫底，淋晒，好难切细件嚟食，而且冇乜味；甜品的甜度合宜，食材配搭比65%可可慕丝夹；全个甜品喺表面上睇系纯白色，好靓
Latte：咖啡nutty但冇乜特别
冻朱古力：狗狗爸爸话朱古力味同牛奶味平衡，但因为咁，可可味唔太突出，有少少过甜
果盘：侍应介绍各种生果的来源地，我哋食完甜品已冇胃纳，需要外带生果同其余甜品、蛋糕；生果的质素好好，提子有葡萄酒香；蜜瓜质感软硬适中，仲好甜；火龙果比平日买到的好食
玛德连：狗狗爸爸话味道单调
朱古力挞：有朱古力味，唔过甜，但就冇乜记忆点
红莓乌龙茶：细细杯，酸甜作结，有少少解腻用途；不过，我见侍应调配时，落咗好大pat红莓酱，所以应该都几甜
柚子朱古力蛋糕：生日赠礼；非常好食！蛋糕轻盈，食落唔漏；佢层次分明但几夹，铺面的柚子酱带酸而开胃，然后系清淡的慕丝蛋糕体，里面夹咗朱古力脆脆，最入面系榛子/朱古力酱，最少有4个层次的味道同质感，食蛋糕时，感觉丰富，满足又唔会食到好饱
整体嚟讲，素食者的选项基本上系零，只系需要表示系vegan定vegetarian，同埋侍应会特别问食唔食西芹，此外就唔需要拣任何菜式；肉食者可3拣1，其中一道主菜系和牛，加$750。以素食者肉度出发，黄豆的味道以及佢的慕丝/布甸口感可以话系贯穿全餐，挑剔啲会觉得食物变化唔大。虽然写到佢的食物有少少单调，但事实上系几啱胃口、轻盈同几好食。环境方面，餐厅有少少暗，昏昏黄黄，下午时段拉上纱帘；座位坐得几舒服，但台与台之间的距离同整体空间感一般（以呢个价钱嚟讲），当full house时，行出行入要就住；餐厅冷气大，一开始唔觉，但坐咗一阵就觉得几冻，食几个钟会有少少顶唔顺。服务方面，人手虽多，但未做到有侍应可长期mark一张台，所以加水唔会即时发生；因为冇中文餐牌，坐低后我哋提出想由广东话侍应讲解，而餐厅只系尽量安排，就算个侍应系香港人，讲广东话，但有啲食材佢哋照样系用英语讲出嚟，其实我同狗狗爸爸都唔系百分百听得明，而且亦唔系每道菜都由果1-2位侍应作广东话讲解，如后续的甜品，照样系由外藉侍应英语演绎，不过虽然有少少语言不通，但侍应们都好有礼貌既。食物方面，我觉得偏咸，呢个大部分系同个人饮食习惯有关，而坐我哋隔离台的食客喺食海胆鱼子酱时亦同侍应反映咸得滞（台与台之间的距离就系我可以隐约听到佢哋同侍应沟通的内容）。嚟呢度食嘢算系一次体验，食完冇太舒服的感觉，始终酱料较浓同咸，加上甜食多，都几heavy，消化上有负担。最后，讲埋我的小贪心，就系生日可以获赠蛋糕，不过我哋发现，几乎台台客都系嚟庆祝生日架，所以餐费都差唔多系包埋个生日蛋糕架喇~~
张贴
