容龍海鮮酒家

营业中

休息中

今晚公司欢送几位退休同事，就在屯门出名高级食府容龙海鲜酒家食晚饭，容龙真系不愧连续14年米芝莲推介餐厅，记得早啲去参观容龙嘅历史，上埋天台睇大炮吖。容龙出名芝士焗开边龙虾，色香味俱全，芝士焗得香口，龙虾肉新鲜爽口又弹牙。砵酒焗美国生蚝，一打开锡纸，香味四溢，生蚝焗完都好大只，蚝边微脆，蚝肉味香浓。豉椒炒大蛏子，大蛏子起肉炒青椒及洋葱，蛏子肉厚及味道清甜，食得好方便。清蒸东星斑，厨师蒸鱼时间啱啱好，唔会过熟，鱼肉保持嫩滑，加上香葱丝及特制蒸鱼豉油，唔会过咸，更加突出东星斑嘅鲜味。蒜蓉粉丝蒸巨型带子，热辣辣上枱，带子蒸得嫩滑，粉丝吸收了蒜蓉及带子嘅精华，大家食到嘴舐舐。仲有容龙秘制焗烧鹅皇及爆炒姜葱鲍鱼煲，都好好味，挂住食，唔记得影相🤭蒜子上汤浸豆苗，可能浸耐咗少少，豆苗冇咁爽口。瑶柱蛋白炒饭，炒得很有镬气，清清淡淡都几好食。