莆田 (形點 I)

营业中

休息中

原本星期日约左朋友去三圣村食海鲜，点知中午12点去到，成条街triple parking，酒楼入面更系people mountain people sea,免得又有群组，转軚去元朗区，一样车水马龙，慨叹揾个清静地方都难。泊车入形点，谂住食肆多啲，分散人流，但多数都排队，瞥眼见到呢间莆田，干净企理有特色，仲话米芝连星级，决定坐低慢慢食。点左酥炸黄花、铁板豆腐、黄金海蛎饼、冰心榴莲，结果除左个冰心榴莲，其他连相都唔影，有啲失望。首先酥炸黄花，外皮唔够酥脆，差少少；再嚟铁板豆腐，唔够啫啫声，冇声气，普通排档更胜一筹。最期待黄金海蛎酥饼，海蛎算新鲜，但系酥饼皮唔够酥脆，炸得亦唔好，上枱饼底聚左一层油😟，最后系冰心榴连，用酥皮包住榴连蓉，外皮一样唔脆，底下有啲汁，食唔出咩材料，不甜不滑，可有可无，唯独是个榴莲蓉还可以。整体而言，个米芝连招牌有啲名过其实，虽然价钱唔算好贵，菜式算有特色，但厨功镬气差左啲，失色不少，希望食店攞左米芝连星，要保住𠮶招牌，对厨房嘅要求一定要维持，否则最后都系会俾人踢走。