東江客家小廚

营业中

休息中

粗茶淡饭——菜式造形大众面，倾向粗糙，实而不华。粗枝大叶——锅有大凹陷照用，隔板随便放。粗声粗气——气氛犹如置身室内大排档，天花乱坠、觥筹交错，落单姐姐时会大嗓门叫喊。粗口横飞——隔离枱三字经组员不断放送。能接受以上四粗，加埋门面有啲邋遢、格局有啲赶客，我都会挑战我承受力，因为我突然好挂住客家菜……以客家酿豆腐尤甚…..不过同我食过嘅客家豆腐有出入，呢间东江系用煲仔菜啲煲上，用汤浸住。未至于「吓瓜」我，不过就缺少咗𠮶种煎香风味，豆腐亦缺豆香，有啲失望，只系叫做配菜津白（定娃娃菜？）系几甜。食小炒我都忍唔住嗌茄子，因为在家煮唔会好似出面走油走到咁癫。呢味茄子牛仔骨煲见识到啲镬气，茄子腍得嚟边缘有啲脆，少许烫㶶，牛仔骨啱啱够熟咬开冇显生肉嘅红，连骨筋位都可咬得断，煮𠮶个时间控制得好熟练。沙姜鸡唔肥，肉滑，败笔系沙姜酱，质似浆糊，唔点好过，本身已够咸。俾大分介乎😋与ok之间，😋因为隔离枱啲𩠌例如煎蚝饼、椒盐乜乜啲卖相真系好得，只系自己枱冇嗌中。还好冇粗心大意（落啱单、上菜快），粗制滥造（见附近枱啲𩠌都极有镬气、份量十足、冒烟热腾腾）「操」之过急……