心滿意粥

营业中

休息中

嚟西环做嘢，见天气冻冰冰，晏昼想食碗热粥暖下胃。记得早几日路过卑路乍街，见到有间新开粥店，一于试下。店舖主打传统粥品，单系生滚粥就已经有成十几款，另外仲有肠粉、油器、炒面和咸肉粽等供应。点咗炸两、肠粉、两碗粥同一只粽，回味炸两做得唔错，肠粉皮厚薄适中，油炸鬼脆卜卜，点埋甜酱同麻酱食，真心好味。碟叉烧肠亦颇有水准，肠粉皮拉得好滑，叉烧有调味过先卷，做得好有心机，食到叉烧香味！状元及第粥材料好丰富，有猪腰、猪润、粉肠、猪肚同肉丸等，另外仲加咗皮蛋。粥底绵密细滑，浓稠度啱啱好，猪润粉嫩爽滑、大件又厚身；肉丸自家制，富猪肉鲜味。至于呢碗生滚鱼腩粥亦很有惊喜，鱼腩有好多件，新鲜肥美，肉厚又无泥味，加咗鲜牛肉，牛肉鲜香嫩滑，粥底绵甜富米香，食完大满足。蛋黄咸肉粽大大只，咸蛋黄靓，肥肉入口即化，用嚟送粥一流！ 见邻桌点了黄糖糕同白糖糕又跟风试下，两款都好好味，糕身松软，甜度适中，绝对值得一吃。