Babbo Trattoria (已結業)

难得约咗老友食饭，大家都钟意食意大利菜，于是约咗喺 Babbo Trattoria 开饭。Meun 印得好精美，成本故事册咁，详细介绍不同类别食品嘅历史同由来。意式面包小点 - 酸酸辣辣但又好浓蕃茄味嘅蕃茄粒，放喺烘脆嘅多士上面，好开胃，再加啲橄榄油，就更加清香。蕃茄酱鸡肝粗管意粉 - 店员介绍我哋试吓鸡肝意粉，佢话意大利人都唔会浪费，都会食动物内脏，但会处理好，切碎咗再加埋蕃茄酱汁煮意粉，我哋听落几意，于是就叫嚟试吓，食落真系好惊喜，由于鸡肝切到好碎，唔系好食到内脏𠮶种腥味，反而食落似肉碎，但又硬硬哋，有肝嘅香味，粗管意粉好弹牙，索晒个酱料，特别得嚟又好好味。双味 Pizza (意式牛肝菌烤鸡、西西里辣味鲜虾) - 听店员讲要做到特定要求先可以叫做拿坡里 pizza，仲要系即叫即做，所以又叫嚟试试。Pizza 饼底好松软烟韧，牛肝菌烤鸡 pizza 食到菌香，辣味鲜虾 pizza 都真系几辣，好惹味，不过我哋两个都食到。呢餐食物味美，仲长知识，见到店员同客人都有互动交流，店员会主动介绍 off menu 食品，同建议菜式，系个唔错嘅体验。