Dodam Chicken (利舞臺廣場)

营业中

休息中

朋友话想食炸鸡， 本身食咩都冇所谓。 不过韩国炸鸡店通常都坐得几舒服， 食吓饮吓计又坐得舒舒服服都不失为一个好提议。今晚去了喺铜锣湾利舞台上面嘅人气炸鸡店。 店铺地方好阔落， 坐得好舒服。 地方系干净企理。韩式手抓饭$78先来地道一吓叫一个韩式手抓饭。 手套已经备上。 有齐地道 材料， 蟹子，紫菜碎和蟹柳肉。 底下亦加入了芝味嘅沙律酱。 上枱时已经闻到阵阵嘅麻油香。 将所有材料捞匀就开始 戴上手套做饭团。 可惜太过湿润， 饭团未能成型， 最后当然用番匙羹就咁食。 饭仍微微暖， 捞入了好香嘅麻油和沙律酱， 入口饭香软糯， 三款材料亦富有口感， 啖啖丰富滋味!可口可乐$22够冻!招牌甜辣芝士无骨烤鸡$198我见好多人都order呢个， 网上评价都唔错决定一试。个铁板热辣辣咁上， 烤鸡香气喷鼻。 见到铺上嘅芝士非常期待。 一定要趁热食， 唔系嘅话芝士溶咗就变硬唔香。 无骨鸡啖啖肉， 配上特制甜甜酸酸嘅酱汁，好惹味! 无骨烤鸡还有 韩国年糕，蔬菜和芝士狮子狗， 好丰富呀! 附设嘅酸萝卜非常清新爽脆! 菜色份量都颇大， 而且坐得好舒服， 极近地铁站， 放工约齐朋友冇难度。