影片
更多
2009-10-10
16 浏览
食神嫂嘅好友大圈牛一, 相约饭局来贺寿, 师傅亦有幸成为坐上客, 实属荣幸; 要知道大圈嘅口味其实一d都唔难, 皆因师傅同大圈食饭唔多过六次, 就已经同佢打过两次边炉, 所以再细问食神嫂后, 大圈果然又系拣打边炉! 于是师傅同食神嫂齐齐谂下, 有咩好地方, 最后师傅揾到呢间食店, 发觉口碑好到不得了, 十二个食评, 十二个笑脸, 平均分达四点一分, 真系唔讲得笑, 所以点都要试试, 于是订左五位!迟左少少先去到, 皆因唔系太识路所以要揾下, 当然唔使好耐就揾到啦! 入到去店内唔算好大, 而安排嘅座位亦甚好, 单边靠墙, 冇咁易撞黎撞去, 正呀; 一坐底大家就开始睇下有咩好食啦, 最后寿星大圈提议招牌鸭汤做汤底, 大家都赞成, 于是又系到抉择要一只鸭定半只鸭; 其实一只同半只都系差三十蚊, 加上师傅觉得鸭身唔会太大只, 所以就话要一只, 点知呢个大圈唔知系惊食唔晒定系其他, 话要半只, 扰攘左一阵都系唔理大圈, 照叫一只鸭稳阵d! 拣完汤底当然系到拣食物啦, 最后拣左手切肥牛, 招牌饺, 鱼扣, 筒蚝, 鳝片, 酒酿鸡丸, 鱼皮饺, 猪皮, 午餐肉, 龙虾丸, 鹅肠, 油墨菜同唐生菜!
迟左少少先去到, 皆因唔系太识路所以要揾下, 当然唔使好耐就揾到啦! 入到去店内唔算好大, 而安排嘅座位亦甚好, 单边靠墙, 冇咁易撞黎撞去, 正呀; 一坐底大家就开始睇下有咩好食啦, 最后寿星大圈提议招牌鸭汤做汤底, 大家都赞成, 于是又系到抉择要一只鸭定半只鸭; 其实一只同半只都系差三十蚊, 加上师傅觉得鸭身唔会太大只, 所以就话要一只, 点知呢个大圈唔知系惊食唔晒定系其他, 话要半只, 扰攘左一阵都系唔理大圈, 照叫一只鸭稳阵d!
拣完汤底当然系到拣食物啦, 最后拣左手切肥牛, 招牌饺, 鱼扣, 筒蚝, 鳝片, 酒酿鸡丸, 鱼皮饺, 猪皮, 午餐肉, 龙虾丸, 鹅肠, 油墨菜同唐生菜! 叫完野食就系弓等嘅时间, 于是食神嫂就夹起碟前菜黎食, 而反应系几好味, 于是师傅就问系咩黎, 最后知道系贡菜, 一d腌制食物, 师傅又试少少, 发觉入口辣辣地, 又几爽口, 都几得意! 其时个锅都煲左一阵, 大家都开始手痕, 就打开个盖睇下个鸭汤系点先; 而当时大圈又讲左句, 一只鸭都系得咁少! 好彩师傅坚持要一只, 不过说实话师傅又唔觉得只鸭细或少, 绝对接受到!
伙计见我地打开左个盖就话个汤可以饮架, 随即每人分一碗, 效率奇高! 好, 就先试下个鸭汤底, 汤底鸭味好重, 但又唔酥, 仲要唔油, 味道够浓, 不错; 而个伙计仲好好咁问仲要添饮吗? 如果唔需要就加番d汤落去, 服务殷勤有礼, 不错; 先饮汤后打边炉, 咁样一锅二食师傅都系第一次, 不过又觉得几特别, 唔错; 其实饮汤期间食物都不断送上, 所以饮完汤后, 等多一阵就已经可以开餐喇!
先讲下手切肥牛, 通常手切肥牛都唔系咁好味, 原因系一放落个锅度一阵, 入口时已经好韧; 但呢度嘅手切肥牛又真系有另一番风味, 将牛肉灼一阵就食得, 牛肉虽谈不上有甚么牛肉香味, 但新鲜味道绝对食得到, 加上入口非常松软, 少少韧嘅感觉都揾唔到, 好真系好好味, 前后柯打左两碟, 师傅觉得系必食推介! 而招牌饺亦都系师傅觉得必食, 叫得招牌饺应该有d计, 试左后师傅第一个感觉系好味, 但好味喺边呢? 招牌饺馅料有木耳同九菜加少少肉, 皮薄而馅料够香够爽,加上九菜味唔会过多, 连师傅一向唔钟意食九菜都觉得好好味, 正呀!
筒蚝同鳝片亦都系高水准, 筒蚝都几大只, 入口半点苦味都冇, 加上非常新鲜, 而蚝身够肥美, 膏亦够多, 真系食完一只再一只, 不过师傅食到有少少沙, 令口感骤降, 但冇听到其他人有问题, 相信系师傅不幸啫, 打边炉有呢d筒蚝真系掂架; 而鳝片一碟得六片, 师傅无意间讲左句得咁少, 可能比呢度老板听到, 佢就同师傅讲呢度嘅鳝片系非一般鳝片, 皆因系咸水鳝? 师傅素来对鳝都冇研究, 但既然讲到咁又试下啦, 一吃之下当然系分唔出系咸水定淡水啦, 但鳝片真系切得薄, 冇骨加上入口唔腥, 师傅觉得食得过!
酒酿鸡丸亦系一样比较特色嘅食物, 酒酿鸡丸有少少似爆浆牛丸, 只不过酿入鸡丸里面应该系花雕酒, 将成粒手打酒酿鸡丸放入口度慢慢咬开, 发觉鸡丸都几爽口弹牙, 而里面热辣辣嘅花雕溶入整个口腔, 好香好好味; 不过食呢粒丸要好小心, 因为鸡丸内里太滚, 如果太大力咬开, 相信会整熟成个口腔; 午餐肉本来应该系不值一提, 但偏偏师傅又觉得好得, 因为入口劲香劲惹味, 加上好耐打边炉都冇得食, 所以特别加分; 鹅肠本应都唔打算, 因为太肥, 但经食神夫妇介绍下, 师傅先知鹅肠肥就等如新鲜, 于是又试下, 发觉灼完后, 一d肥膏都冇, 而且劲爽口, 超好味!
至于鱼皮饺, 猪皮, 鱼扣, 油墨菜同唐生菜师傅觉得冇咩特别, 当然唔差啦; 反而师傅嘅至爱龙虾丸就令人失望, 龙虾丸唔算爽口弹牙, 最惨就系入口后香都唔香, 完全冇左食龙虾丸𠮶种香同爽嘅感觉, 师傅希望呢间食店可以换过另一款龙虾丸啦! 打边炉啤酒汽水就少不免, 但呢度都唔算贵, 三蚊就有枝啤酒, 都抵饮架!
总括黎讲食物质素出色, 打边炉最紧要系汤底靓同配料新鲜, 呢度两样都做到, 而环境都舒服, 服务态度友善, 价钱唔系太贵, 五个人食咁多野, 埋单都系一千, 算抵食! 老三火锅贺大圈相信能令寿星大圈满意, 如果有机会师傅一定会黎呢间, 值得推荐! 如无意外呢个将会系呢间食店嘅身第十三个食评加第十三个笑脸!
张贴
