影片
更多
2020-11-21
881 浏览
今年爸爸生日就买左Pie & Tart嘅芒果天使庆祝🎉。原本逢亲屋企人生日，几乎次次都系买红车厘面包西饼嘅栗子蛋糕庆祝嘅，已经连续买左5、6年，平得嚟，份量又足，又多生果，又好味。但系个栗子蛋糕围边嘅杏仁片真系肉眼可见嘅越嚟越少，比起第一次买果阵至少少左三分一（应该唔止）。同埋入面蛋糕底都系年年缩水，反而D cream就越嚟越多😥。所以今年咪林住去第二间买生日蛋糕，试下新口味啰~咁啱系网上讨论区见到有人话Pie & Tart嘅蛋糕系平靓正之选😍，咪去试下啰。本身住系港岛区，屋企附近无Pie & Tart分店，要特登去铜锣湾买（无记错嘅话，港岛区好似得铜锣湾一间分店🧐）。之前系讨论区见到有人upload咗d店铺嘅相，见到铺头都会有蛋糕摆咗出嚟俾人拣嘅。因为系第一次买，就林住去到分店睇下d蛋糕款式先决定买唔买啰。点知，去到分店，净系见到摆咗d挞同面包，见唔到任何蛋糕，店员话蛋糕店内无现货，要订先有。铜锣湾间铺头唔算大，唔知系咪因为咁样先无可以即场买嘅蛋糕呢？定系因为平时都无咩人会去间铺walk in买蛋糕？无论点都好啦，都决定左今次要试下Pie & Tart嘅蛋糕嘅。系官网睇左蛋糕款式，决
原本逢亲屋企人生日，几乎次次都系买红车厘面包西饼嘅栗子蛋糕庆祝嘅，已经连续买左5、6年，平得嚟，份量又足，又多生果，又好味。但系个栗子蛋糕围边嘅杏仁片真系肉眼可见嘅越嚟越少，比起第一次买果阵至少少左三分一（应该唔止）。同埋入面蛋糕底都系年年缩水，反而D cream就越嚟越多😥。所以今年咪林住去第二间买生日蛋糕，试下新口味啰~咁啱系网上讨论区见到有人话Pie & Tart嘅蛋糕系平靓正之选😍，咪去试下啰。
本身住系港岛区，屋企附近无Pie & Tart分店，要特登去铜锣湾买（无记错嘅话，港岛区好似得铜锣湾一间分店🧐）。之前系讨论区见到有人upload咗d店铺嘅相，见到铺头都会有蛋糕摆咗出嚟俾人拣嘅。因为系第一次买，就林住去到分店睇下d蛋糕款式先决定买唔买啰。点知，去到分店，净系见到摆咗d挞同面包，见唔到任何蛋糕，店员话蛋糕店内无现货，要订先有。铜锣湾间铺头唔算大，唔知系咪因为咁样先无可以即场买嘅蛋糕呢？定系因为平时都无咩人会去间铺walk in买蛋糕？
无论点都好啦，都决定左今次要试下Pie & Tart嘅蛋糕嘅。系官网睇左蛋糕款式，决定左要订芒果天使。拎部电话俾咗店员睇个蛋糕款式同名，同埋都有同佢讲要「芒果天使」嘅，点知佢准备写单果阵，就拎住本蛋糕menu（佢都用咗唔短嘅时间嚟揾本menu）指住第二款芒果蛋糕嘅图片，问我系咪要果款。我紧系即时话唔系啦，就又拎部电话俾佢睇多次个蛋糕款式同名啦，跟住佢就好似好疑惑咁，答我「无㖞，我哋无哩款蛋糕㖞，芒果蛋糕得哩款㖞……」😳😳😳。跟住佢又成本menu睇多次，终于系menu到揾到「芒果天使」。真心觉得佢对产品唔熟悉🙃。
之后就落单啦。蛋糕本身158蚊，唔包朱古力牌或糖牌嘅，要另外加钱，糖牌一个5蚊，朱古力牌要10蚊。果阵，单已经差唔多写好啦，听到蛋糕本身无牌，突然间唔系好想买，就同店员话唔好意思唔订住啦，跟住走左。店员都好好人，无话咩野（至少无当面话啦）。之后，林咗一阵都系决定左要定个蛋糕，就行翻转头，果阵店员已经将之前写好张单撕烂dum咗。佢好好人，同佢讲都系要订个蛋糕，佢又即时拎翻纸碎重新写过张单，态度好好。
因为惊到时蛋糕会有太多cream，我咪试下问佢蛋糕可唔可以少D cream，佢话到时会同师傅讲声。费时佢到时唔记得讲啦，我就即时请佢系张单到备注番「少cream， 少糖」，佢果阵都无话唔得嘅，都系写咗（有单为证）。点知，到我搭紧车返屋企果阵，佢又打电话嚟话Fax张单俾写字楼睇，写字楼话无得少cream少糖😳。哈？唔得嘅话，落单果阵又唔讲，定系其实根本你自己都唔清楚啊？对产品根本都唔瞭解啰~讲真，果下真系有D嬲嬲哋，就问佢唔订退钱得唔得，佢话都得嘅。但之后费时麻烦，嬲尾都系照订嘅。
到拎蛋糕果日，去到同佢讲要拎蛋糕，佢先由雪柜拎个已经入咗盒嘅蛋糕出嚟。佢哋个蛋糕盒比较似箱多d，唔系果种揭盖嘅，个顶系似箱咁样左右合埋嘅。佢当时未封个盒顶嘅，俾我睇咗之后先用胶纸封好个盒。我加咗个朱古力牌，朱古力牌系同蛋糕分开嘅，另外摆咗系个塑料盒入面，店员让我等要食蛋糕果阵先自己插翻上去。
——————————————————
👀顺便讲埋：
（1）佢哋个挞同批款式都几多下嘅，价钱唔算平。但系去订蛋糕同拎蛋糕果阵都见到每隔几分钟就有人会嚟买件挞或批，证明D挞同批应该都系几好味嘅。今次净系买咗蛋糕，无买挞或批，下次有机会试下。
（2）之前系长沙湾地铁站好似都见到有分店，D挞同批望落去好好味咁，香味都好浓郁。但系今次系铜锣湾分店就闻唔到咁浓郁嘅香味啦，感觉好似无长沙湾分店好食，同埋无咁吸引。可能系因为D挞同批已经整好左一段时间，唔系热辣辣啱啱出炉挂?
（3）铜锣湾分店店员嘅服务态度真系好好（同我接触嘅主要都系较年长果位店员），同埋有交代啦，知蛋糕无得少cream同少糖后就会特登打电话通知。唯一缺点就系好似对公司嘅冻品（蛋糕之类嘅野）好唔瞭解。
（4）其实本身林住系加糖牌嘅，但系店员就话唔到糖牌整出来大概会系点样，净系用手比到个大概size俾我睇。我咪上网揾图片俾佢睇，问佢系咪差唔多系咁啰，佢话自己都唔清楚㖞，话个糖牌应该唔系彩色，无咁靓。费时到时整咗嘅糖牌太过样衰，我唯有选择加朱古力牌啰。
——————————————————
食评：
芒果天使蛋糕(1磅)158蚊，朱古力牌另外加10蚊，合共168蚊。免费附赠切蛋糕嘅塑料刀一支同埋三支生日蜡烛。
比起出边嘅朱古力牌，Pie & Tart 个朱古力牌可以话系十分之厚，上面嘅字清晰。
讲真蛋糕望上去都几靓嘅，有芒果啫喱围边，个面有d细细粒圆圆哋饼干、士多啤梨同埋马卡龙。
马卡龙个样好好睇，但系好难食。食落去好林好黐牙同埋个馅太甜，简直甜到怀疑人生。
本身以为入面会系海绵蛋糕同慕斯平均分配，点知慕斯几乎占咗成个蛋糕嘅四分三，海绵蛋糕好少好少（每层高度得1cm左右）。海绵蛋糕同慕斯梅花间竹咁样，各有两层。慕斯配海绵蛋糕都几好食嘅，好似食紧雪糕咁。
芒果啫喱围边见到有芒果果粒，果层围边唔会太甜，感觉唔到有咩味，麻麻哋啦。
唔记马卡龙同啫喱围边嘅话，整体来讲，蛋糕都几好味嘅，慕斯好creamy。当然，如果无咗马卡龙同啫喱围边，蛋糕可能会无咁靓。蛋糕又靓，份量又足，同埋好味，咁样质素嘅蛋糕要158蚊，个人觉得系接受到嘅。
——————————————————
简单总结:
（1为最低分，10为最高分）
外观：8
味道：7（马卡龙太难食啦！）
价钱：6
店员服务态度：8
店员对产品瞭解程度：3
张贴
