Deer Kitchen (荃新天地) (已結業)

今日同朋友去咗荃湾荃新天地嘅Deer Kitchen食晚餐，见佢哋新推出咗个几靓嘅鸟笼二人套餐，所以嗌咗嚟试一试。餐厅入面嘅环境阔落，摆满咗好多同鹿鹿相关嘅装饰。两人份量嘅鸟笼套餐就好似英式high tea咁分咗几层，不过呢个就梗系冇咁讲究，顶层有沙律、Parma Ham包蜜瓜、迷你芝士蛋糕同迷你macaron，前菜算正常发挥，甜品亦都唔算太甜。中间𠮶层有龙虾汤、明太子蟹肉酥盒、海苔鱿鱼同脆炸鸡翼，龙虾汤味道几浓郁，有几粒龙虾肉，汤亦都非常浓稠。炸鱿鱼同鸡翼都系新鲜炸起，咬落去仲热辣辣。底层有澳洲草饲牛板腱扒同西班牙黑毛猪肉眼，煎牛扒嘅熟成程度啱啱好，唔会有血水，食落亦都有牛味，猪扒都无煎到好干身，都仲有肉汁，配埋蘑菇汁一齐食都唔错。跟餐仲包埋两杯特饮，我哋拣咗蓝色美人鱼同热带果园，两杯都系果汁沟咗梳打气泡水，酸酸甜甜又有气，都几开胃！📍荃湾杨屋道1号荃新天地地下G06-07号舖位置就脚：🍊🍊🍊🍊 餐厅环境：🍊🍊🍊🍊食物味道：🍊🍊🍊🍊整体CP值：🍊🍊🍊🍊