泰特色泰國餐廳 (已結業)

今晚嚟到呢度一試，等位情況尚算輕鬆，等幾張檯就可以上樓入座，上樓之前仲可以响樓下預先點餐，好有效率嘅服務構思。先鎖定餐牌上呢兩味。果然係有圖有真相，實物同餐牌比對似樣程度達九成以上，冇好似啲連鎖快餐店咁相靚過食物N倍，好均真。泰式蔭生蝦沙律，其實就係坊間叫慣嘅「泰式生蝦刺身」。所謂沙律亦確實冇花假，皆因沙律底竟然用上刨得好鬼乾淨嘅苦瓜切片。蝦肉爽，醬汁掂；蒜片大小恰到好處，辣椒略嫌多咗啲啲。苦與辣嘅結合配合得天衣無縫，係一道好精彩嘅前菜！食完至寫稿時相隔已經四個鐘頭，冇肚痛，衛生過關。話說肥仔奇從來對於熟魚嘅興趣只流於去人哋擺酒時果一條東星之類嘅大條蒸魚，平時甚少主動食魚。今日唔知做乜嘢點咗呢味泰式明爐魚。眾所周知，呢道菜幾乎無一例外總係用烏頭，而烏頭除咗打冷同泰式酸辣做法之外，其他做法都難以除去烏頭嘅泥味。今晚呢條魚就做得好出色。細骨少、魚肉多；一啖魚配以一口爐中滾住嘅酸辣熱湯嚟食，fit到漏油！又有神奇處，唔明點解呢類爐底易燃啫喱永遠都好似加咗感應器咁，你差唔多食完佢就曉得熄火。青檸梳打早已處理好至上檯，唔係畀支梳打水、糖水你自拮自斟果種飲法。飲落冇特別。泰式凍奶茶則非常奇特，唔係