Quezon Pinoy Food Express (已結業)

Quezon Pinoy专卖菲律宾食物，由骆克道搬咗过嚟石水渠街，可见小铺挨租都唔易生存，不过佢都做咗好几年，可见小店都有一定捧场客，而且售卖唔少特色糕点，贪得意一试无妨。这晚跟食友饭聚，喜获靓女食友赠予一件「蛋批」，拎起非常坠手，咁够份量，就一于当第二朝早餐，正呀！不过，见其他食友所赠嘅喺「椰子批」，似乎仲正仲特别㖞，但乜批都好，都喺老友一番心意，绝对无得比。其实，印象中，菲律宾菜都好似无乜接触过，咁今次又难得可以试番一下。个蛋批以牛油挞皮嚟做个批底及批边，算不上好重牛油味，但做得够薄身，唔会一旧粉咁；而中间吉士蛋浆嘅滑溜度，跟我哋中式蛋挞嘅有得挥，不过蛋味唔算好强，而面层亦比蛋挞烘得较为焦黄，但奇怪又唔似葡挞𠮶重焦香；甜度亦无想像中咁犀利，所以当甜品之余，当早餐亦得，整体都总算唔错，食完令人好饱肚添。谢谢食友令我有此机会品尝菲式蛋批！