番茄18 (觀塘工業中心)

营业中

休息中

今朝一早要过观塘攞货，出动劳力之前梗系要食饱啲，就去咗位于观塘工业大厦嘅番茄18。虽然位处于工厦，但一入到餐厅环境即刻唔同晒，装修都甚有特色，既光猛又坐得舒服。早餐选择都几多，而最吸引我嘅当然系佢哋嘅招牌汤底，所以我就拣咗招牌番茄叉烧汤米线配牛乳炒蛋，牛油厚多士。招牌蕃茄叉烧汤米线嘅蕃茄汤底非常浓郁，我仲见到佢除咗有蕃茄之外，仲加入咗洋葱，所以除咗有蕃茄嘅酸，仲有洋葱嘅甜味，好味又开胃。而佢嘅叉烧系属于自家制，肥瘦适中，而且烧得都几香口，如果可以再厚切啲就更加正喇！另外早餐仲配埋牛乳炒蛋牛油厚多士。牛乳炒蛋炒得好滑，颜色又够鲜艳，无论净食炒蛋、配多士，或加入汤米线食，都咁夹咁好味。特别要赞吓呢块牛油厚多士，烘得啱啱好，表面香脆，而入面松软，加上适量嘅牛油，真系冇得弹。另外加钱拣咗华田脆脆，上面仲有满满嘅阿华田粉，走甜嘅味道最适合我。另外仲拣咗两款小食，瑞士汁鸡中翼都系佢哋嘅镇店之宝之一，每只鸡翼都胀卜卜，而入面嘅鸡肉仲好嫩滑，配上咸甜适中嘅瑞士汁，真系忍唔住食完一只又一只。最后我仲拣咗麻辣双色饺子，黄皮嘅系粟米饺，而白皮嘅系白菜猪肉饺，配埋麻辣酱就够晒醒胃。