FireBird

营业中

休息中

今日我终于有机会嚟到铜锣湾一间成日路经嘅日本餐厅，试咗佢地嘅串烧、沙律同炸物等菜式，果然冇令我失望！FireBird 三代目软壳蟹沙律，呢个沙律入面有芝士、蕃茄、苹果、生菜、黄椒、脆脆、蛋白粒、青瓜同提子干。整体嚟讲，食落去既新鲜又有多重口感，软壳蟹亦好脆身。炸鸡软骨，够晒香口，作为餐前小食送酒一流！豆腐牛舌煮，豆腐好滑，牛舌同萝卜片都煮得好腍好入味。鳗鱼4点盛合，令人惊喜嘅选择，有玉子烧鳗鱼、刺身鳗鱼、寿司同埋鳗鱼芝士卷。玉子烧同鳗鱼出奇地夹；鳗鱼本身亦好肉地；鳗鱼芝士卷有少少辣，连埋芝士味道好特别。特上牛肉串烧盛合包括秋葵、牛肉包金菇或者菜、牛舌同牛柳粒，仲会附上蛋黄拌寿喜烧串，味道一流，肉质鲜嫩多汁。明太子自家制免治鸡肉棒，明太子好惹味，鸡肉棒有少少软骨够咬口，整体鸡味浓沃。我哋今晚仲叫咗两杯cocktail，我拣咗Fuji Mountain，重荔枝味，清新得嚟唔会太甜，好好饮。朋友叫咗Strawberry Yakult Cocktail，简直系少女心嘅选择，成杯粉红色，带新鲜士多啤梨味，仲加咗士多啤梨片装饰。值得一提嘅系，呢间餐厅洗手间仲提供牙线，真系好贴心。