喜記蟹將軍 (iSQUARE國際廣場) (已搬遷) 新店位置

同長輩晚飯，當然要搵個舒適嘅地方，而食物亦要有返咁上下質素啦。喺iSquare見到依間餐廳，其他人嘅評價都唔錯，一於試試😎😎六點左右嚟到，天都未黑齊，有落地大玻璃，都算幾開揚。食物方面，由於得兩個人，都唔可以叫太多。肉蟹（小）如果想食蟹，可以嗌細嘅份量，豐儉由人。避風塘感覺十足，好有鑊氣，賣相都幾好。蟹肉都算多，甜甜地，慢慢食，都幾過癮。另外一個係蒜蓉粉絲蒸蟶子，估唔到咁大隻！味道非常鮮甜！如果淨係食海鮮，點會夠飽呢，始終海鮮價錢會比較貴。咁就梗係要叫返啲穩陣嘅小菜啦😁😁 金牌小炒王，蝦干都幾大隻👍🏼👍🏼 韭菜花柔嫩，清新，唔錯。香烤柚子骨，呢個菜式比較精緻，味道甜甜酸酸，都幾開胃，如果可以份量多d就更加正😆😆最後加埋碟炒飯湊一湊米氣，就夠晒滿足。炒飯飯粒粒粒分明嘅，都係鑊氣十足，中規中矩吧😁😁整體都唔錯，加上地理位置又方便，如果想要高質少少又有海鮮嘅晚餐，呢度都係唔錯嘅選擇。