Opa Mediterranean Bar and Bistro (已結業)

自己一路都好钟意食地中海嘅菜式，以前去土耳其嘅时候，成日都要饮佢嘅Bean Soup，但系返到嚟香港之后，呢一类嘅餐厅其实真系唔多，可以食得返有地道风味嘅地中海菜，真系要啲时间去揾揾。难得收得早，所以就喺尖沙咀附近揾吓有啲乜嘢地方系坐得舒服嘅，同时间亦都可以食少少野。一坐低嘅时候，天气其实虽然唔算特别热，但系自己都好想可以饮一啲解渴嘅嘢。由于佢呢度冇1664 ，所以我就叫咗一杯Hoegaarden白啤，Happy Hour都系$68杯，其实一啲都唔算贵。之后我竟然揾到佢有Bean Soup，所以就一定唔少得会叫一叫。饮落去嘅时候，饮得出佢呢一碗嘅Bean Soup用咗几款豆磨制而成，但入口感觉又好顺滑，而且唔咸，绝对值得一试。之后我叫咗一个小食：香蒜牛油大虾🍤，我起初以为佢系会比几只大虾我，然后开左边，再加少少蒜蓉喺上面；但当佢送到黎嘅时候，我就明白我嘅期望系错嘅；反而更加惊喜嘅就系佢融合咗地中海嘅风味，用上咗唔同款式嘅青椒红椒，再加埋蒜蓉，mix成一堆蒜泥，再混和大虾，用匙羹慢慢食，每一啖都系一堆蒜蓉、红椒青椒、同埋大虾，非常特别👍呢度嘅环境亦都非常优美，我好喜欢。