博多拉麵別天神 (已結業)

之前已经食过铜锣湾同尖沙咀店，近排知道湾仔有一间，所以今日做完facial 后，Mr.J带咗我去食喇。别天神一向都系我同Mr.J都喜欢食嘅，特别系虾味噌豚骨拉面。今日虾味噌豚骨拉面无得卖，所以同Mr.J都叫咗别天神套餐，跟餐嘅小食分别要煎饺同小龙虾蟹子沙律。小龙虾蟹子沙律好好味，每啖都有小龙虾肉，食落去好满足。而且用紫菜包住食，味觉上好夹。煎饺一般，如果个底脆少少会更好。豚骨拉面嘅面底系幼身，比较爽口弹牙。叉烧比较瘦同淋，无咩特别。只溏心蛋不错，无过熟，仲有少少嘅蛋香𠻹。我最欣赏嘅系个汤底，有唔少嘅拉面店为个咗豚骨汤可以呈现出奶白色嘅浓厚骨汤感觉而加奶类制品落去，而别天神唔会加依啲野落去，加上唔落味精，饮几多都唔口渴。依度嘅汤底味道上不错，唔多油唔太浓，饮落去唔杰身，感觉有啲似屋企煲嘅鱼汤，好好饮。下次要嚟食返我最喜欢嘅虾味噌豚骨拉面！