白鬍子炸魚薯條 (已結業)

喺香港唔同地方都食过炸鱼薯条，但有唔少嘅炸浆都超厚之余，仲要食落超油腻，所以好难食。之前同事食过后话白胡子嘅炸鱼薯条整得唔错，搞到我好想去试下，趁今日放假就去咗食喇。(P.S 薯条系Mr.J嘅最爱，鱼系我嘅最爱，所以特登去食都无问题啦)就算连炸鱼薯条都有5种唔同嘅选择，今日拣咗柠檬黑椒炸鱼薯条，另外叫咗鱿鱼圈篮同香蒜牛油薯条。食店附近都有几张公用枱方便大家坐低食。等咗一阵，就有得食喇。第一时间就闻到香蒜牛油薯条嘅香味，因为薯条系炸完之后再用香蒜牛油捞，所以要尽快食，否则会痴埋一齐。薯条系粗身连皮嘅，虽然系炸完再捞牛油，但都唔会太淋，好好味。主角当然系炸鱼薯条，今次要柠檬黑椒味，因为比较特别，出面少有嘛。微微嘅黑椒味再加上柠檬汁，无抢走炸鱼的味道，柠檬汁仲将鱼嘅腥味带走咗。另一方面，炸鱼嘅炸浆好薄，食落唔油腻仲有少少鱼的鲜味，味道做得好平均。薯条当然都炸得刚刚好，好好味。至于鱿鱼圈，炸浆都系好薄，属于松化嘅一类。咬落鱿鱼圈仲系弹牙，再唧柠檬汁上去，除去咗腥味同油腻感，不错。P.S 一路等食物时，不断有好多外国人落单，可能香港比较少有依类专卖炸鱼薯条嘅舖头，间唔中食可以医下思乡病。