影片
更多
2012-09-20
345 浏览
响西环住左大半年，食黎食去果三、四间粥粉面饭，寻日第一次想行远 D 揾食，就试下呢间潮州粉面舖。帮衬后决定写篇食评赞下佢（虽然我完全冇影相）。今次亦系我第一次写食评，希望推介倒正野畀大家。本身我想睇下贵唔贵先决定系咪帮衬，但响店舖门口果几个大型餐牌度都揾唔倒价钱。而且都系粥 ge 资料多，有咩面就唔系好睇倒。我行完左、再行右、再行去左，最后唔好意思斋睇唔买，就入左去坐喇。坐低之后我都仲望紧有咩食、几多钱等资料，有两个迟过我入去 ge 客人都点左菜喇，于是到我想点野食 ge 时候，个婶婶店员就忙住话畀厨房知 D 柯打。反正我唔赶时间，就谂住等佢得闲先再落柯打，点知呢个时候另一个婶婶（可能系老板娘？）就开口提佢：「个靓女叫左野食未？」佢就即刻由厨房行返出黎问：「靓女想食咩？」果刻我真系心中佩服：「哗！真系好识做生意，系唔系都赞靓女！仲好有礼貌……」通常其他舖只会问句「阿姐要咩呀」ga 咋！叫左两样食物：牛肚河（少河粉）、芥兰（汤上）等待 ge 期间，睇下周围环境。呢间舖四分之一地方系厨房，仲有两个厕所，其实都霸左唔少位。成个场得八张台，有几张系逼逼地，不过好在大家都快食快走。卫生情况我觉得
本身我想睇下贵唔贵先决定系咪帮衬，但响店舖门口果几个大型餐牌度都揾唔倒价钱。而且都系粥 ge 资料多，有咩面就唔系好睇倒。我行完左、再行右、再行去左，最后唔好意思斋睇唔买，就入左去坐喇。坐低之后我都仲望紧有咩食、几多钱等资料，有两个迟过我入去 ge 客人都点左菜喇，于是到我想点野食 ge 时候，个婶婶店员就忙住话畀厨房知 D 柯打。
反正我唔赶时间，就谂住等佢得闲先再落柯打，点知呢个时候另一个婶婶（可能系老板娘？）就开口提佢：「个靓女叫左野食未？」佢就即刻由厨房行返出黎问：「靓女想食咩？」果刻我真系心中佩服：「哗！真系好识做生意，系唔系都赞靓女！仲好有礼貌……」通常其他舖只会问句「阿姐要咩呀」ga 咋！
叫左两样食物：牛肚河（少河粉）、芥兰（汤上）
等待 ge 期间，睇下周围环境。呢间舖四分之一地方系厨房，仲有两个厕所，其实都霸左唔少位。成个场得八张台，有几张系逼逼地，不过好在大家都快食快走。卫生情况我觉得已经唔错，只系每次有人出入厕所就会有一只乌蝇飞出来（我坐响近厕所位所以都间中要挥挥手赶走佢，好在得一只。
过左唔系好耐，野食黎喇！两款都热辣辣，真系出哂烟咁 ga……
牛肚河（少河粉）
有五块牛肚，都算系大件。河粉系幼身 ge，我觉得已经算系滑。加埋佢有唔少葱花，我觉得真系唔小器㖞，依家好多餐厅都介意畀多两粒葱畀客人，仲会同个客讲：「依家葱仲贵过菜呀！」跟住我想揾下台面除左辣椒油之外，有冇炒蒜粒可以放落个粉度，疑似老板娘真系一眼关七，即刻问我揾咩？我答完佢之后，佢话：「呢度冇㖞！」咁我就谂算啦，都知唔系一定有，但转头佢入厨房拎左一小碟炒蒜粒出黎畀我！！！
芥兰（汤上）
初时我见倒碗芥兰，真系有 D 惊佢仲未熟，因为面头有几条粗的菜头，所以我食粉食到咁上下先夹菜食，希望用汤浸耐 D 先。但系，一食落去，我觉得真系好正㖞！唔单止唔生，里面都冇起根，个心仲系甜 ga！而且成碗菜都系大条的菜头或菜叶，得两粒唔食得 ge 菜花，唔会成堆都系细叶同菜花，真系良心品质。
题外话/补充资料：
留意左一阵，我发现呢间舖 ge 员工畀倒客人好舒服 ge 感觉（当然唔系只因佢赞我靓同埋醒我一碟蒜粒啦:P），因为 D 员工系默默耕耘果种人，冇强逼、唔计较、对客人亦细心，有好多例子 ga：
1. 我响出面行来行去时，佢唔会 chur 我问「几多位呀？入黎坐啦！」
2. 冇 chur 过客人落柯打，个个入到黎都可以坐定定（有 D 人仲坐完一张又一张，不停拣凳仔）先慢慢叫野食。
3. 有两个讲英文 ge 华人（我估系韩国人）入左舖头，一个不停教另一个认中文字，佢地都好有耐性，亦唔会走去加把口话「试呢个啦！呢个好食。」
4. 两个疑似韩国人话完叫 take away 又转堂食，另一女士中途改柯打由双丸变四宝；两个婶婶同埋厨房两位叔叔都冇出过声话人。
5. 有对夫妇，太太应该系有左 BB，叫左一碗加底墨丸粉，佢地就畀定个碗仔同匙羹畀客人。
6. 有个客话想要多花生，即刻畀。
……
坐低食碗粉咁短 ge 时间都见倒佢地咁好咁对客人，所以真系唔畀笑脸佢地都唔得。:)
(以上食记乃用户个人意见 , 并不代表OpenRice之观点。)
张贴