農家菜館 (已結業)

呢日同屋企人一行二十几人到位于屯门蓝地嘅农家菜馆预祝母亲节，餐厅总共有三层我哋喺中间𠮶层用膳。生炒排骨($68)，排骨够入味，外皮松化，酱汁酸味妹好开胃！时菜炒牛肉白菜仔($58), 牛肉有牛味，唔靭又份量足，白菜仔吸左D牛肉味好好食。头抽豉油鸡($168), 豉油味咸甜适中鸡肉入味得嚟够嫩滑，正！农家炸子鸡($208)，鸡皮香脆，鸡肉嫩滑入味，无得输！可惜唔记得影相。小炒王($78)，呢个𩠌系全晚精彩之中的精彩，鲜鱿、鲜虾、虾干炒韮王，炒虾干的香味令全个𩠌好好食之余仲有一种好好食的味道，老板卖关子话系秘制香料，呢个𩠌嚟到一定要试！松子黄鱼($168), 黄鱼鲜嫩一D都唔腥，脆酱松化，加上个酸酸甜甜的酱汁入面有松子、菠萝、椰果、青椒等，好味又口感丰富。蒜蓉粉丝蒸鲜鱿($98)，鲜鱿量足新鲜又唔靭，蒜蓉令到鲜鱿更味美，碟底的粉丝吸左鲜鱿的味道更加系无得弹！最尾送嘅雪耳木瓜糖水饮落非常清润，啱晒平时夜瞓嘅我。总括嚟讲呢餐嘅𩠌菜都非常味美，埋单每人都只一百蚊左右，我会再嚟帮衬!