瀚林廳 (已結業)

今晚我们去咗尖东「海景嘉福酒店」嘅「瀚林厅」参加好朋友嘅婚宴！大红乳猪全体：虽然皮脆肉嫩，但有一层好厚嘅肥膏，有啲美中不足！翡翠花枝虾球：虾球好爽口弹牙，花枝片唔太爽口同比较腍，西芹有根同有草青味！香酥脆蟹钳：卖相炸得金黄香脆，但味道就淡而无味！蟹肉扒时蔬：蟹肉嘅份量比较少，西兰花亦有草青味！花胶菜胆炖北菇汤：完全无汤味，花胶系一早白灼好之后放落汤面，完全唔系一盅炖汤嘅做法！碧绿鲜鲍片：鲍片好似无经烹调过，就加上鲍汁，小棠菜亦未煮熟，有非常浓烈嘅草青味！清蒸老虎斑：肉质都几新鲜同嫩滑！当红炸子鸡：都几皮脆肉嫩，鸡味都几浓郁！金丝烩伊面：炒得一啲都唔干身，非常湿同面质过腍，味道淡而无味！鲍汁鸡粒炒饭：炒饭好「鞋」，味道亦都系淡而无味！莲子百合红枣茶：有一种怪怪嘅味道！合时鲜果盘：系本人从未食过咁难食嘅果盘！西瓜嘅色泽好似唔正常嘅血红色，有点吓人！食落系完全无味！哈蜜瓜同蜜瓜雪到变坏咗！士多啤梨极之非常酸！我真系想像唔到作为一间几星级酒店嘅中菜厅，以一万二千几蚊一围嘅价钱，出品食物嘅质素可以咁差劣，真系失败之中嘅失败！