瀛燒居酒屋

营业中

休息中

今日约咗朋友喺荃湾行街,行到攰攰哋谂住喺附近揾啲嘢食下。无意中见到一间日式居酒屋门口餐牌写住啤酒放题,清酒放题,另外食物价钱合理所以试下。瀛烧居酒屋,餐厅位置喺荃湾亨和街5至7号香城大厦地下,入到餐厅原来有两层,我哋就贪方便坐咗喺楼下,餐厅嘅布置好有日式感觉,好似真系置身于日本。同朋友食串烧,饮少少酒倾下偈,感觉真系放松。牛舌芯 ,牛舌芯食落去特别爽口弹牙,牛肉味好香浓,加少少盐吊出牛肉嘅香味,又爽又香口。网烧顶级牛肋骨 ,牛肋骨上枱已经闻到好香嘅味道,牛肉味香浓,脂肪分布均匀,有入口即溶嘅感觉,牛肉烧到啱啱好,肉质仲系好嫩滑,畀100分。味噌广岛蚝锅 ,广岛蚝望落去已经知道好新鲜,汤底味道香甜,配上新鲜嘅广岛蚝,令到个鲜味更加突出,野菜吸收晒啲鲜味,食落去又香又爽。另外点咗明太子烧鸡翼,串炸莲藕,日本宫崎肠,串炸冬菇,串炸鸡髀肉,我钟意食明太子烧鸡翼,鸡翼烧到金黄色,鸡皮香脆入面嘅鸡肉嫩滑多汁,加上明太子嘅咸香味,味道更加有层次。朋友就点咗壶装清酒 ,我就点咗杯自家手作梅酒,梅酒味道清香,酸酸甜甜特别开胃,有惊喜。