影片
更多
2023-03-08
119 浏览
上个月生日，朋友仔话要带我去「山YAMA」食Omakase🥳 虽然餐厅系新开，但系极高水准，摆盘赏心悦目，简直系神级享受‼️ 师傅好有经验，完全感受到佢地对食物﹑环境﹑服务既用心，令人回味不已，诚意推介❤️🔥餐厅装潢行和风木系风格，简洁明亮，以山林为主题，配合返餐厅名「山」，流露自然恬静气息。环境阔落，落地玻璃可以欣赏到铜锣湾街景，好有空间感。用餐区域划分为吧枱同座位区，想坐吧枱欣赏师傅功架既话记得book位时讲定😉 店员仲带左我地去室外露台参观~ 有棵樱花树可以影相打卡，仲可以饱览楼景同马场景色，环境一流😍「山」晚市提供唔同主题既Omakase套餐：和牛﹑海鲜﹑鱼﹑蟹，各有特色，价位由$1,088起。而「山之御膳」$1,888 更加系集百家之大成🥹 以尊贵上乘日本直送食材入馔，再以华丽精致摆盘呈现，连餐碟/摆盘都同「山」有关联🗻 尽显心思！无论系味觉﹑视觉或嗅觉上都有全新体验，极高质素！而午市比较经济实惠~ 低至$368/$588就可以食到omakese，CP值高✅今次拣左「山之御膳」套餐，用餐时间大约2.5小时⏱♢ Appetizer | 日本产云丹拼盘第一道菜出场就喷哂烟，打卡效果
餐厅装潢行和风木系风格，简洁明亮，以山林为主题，配合返餐厅名「山」，流露自然恬静气息。环境阔落，落地玻璃可以欣赏到铜锣湾街景，好有空间感。用餐区域划分为吧枱同座位区，想坐吧枱欣赏师傅功架既话记得book位时讲定😉 店员仲带左我地去室外露台参观~ 有棵樱花树可以影相打卡，仲可以饱览楼景同马场景色，环境一流😍
「山」晚市提供唔同主题既Omakase套餐：和牛﹑海鲜﹑鱼﹑蟹，各有特色，价位由$1,088起。而「山之御膳」$1,888 更加系集百家之大成🥹 以尊贵上乘日本直送食材入馔，再以华丽精致摆盘呈现，连餐碟/摆盘都同「山」有关联🗻 尽显心思！无论系味觉﹑视觉或嗅觉上都有全新体验，极高质素！而午市比较经济实惠~ 低至$368/$588就可以食到omakese，CP值高✅
今次拣左「山之御膳」套餐，用餐时间大约2.5小时⏱
♢ Appetizer | 日本产云丹拼盘
第一道菜出场就喷哂烟，打卡效果一流😍 海胆来自日本5个唔同地区：岩手﹑浜中町﹑根室﹑宫城﹑北方四岛，全部都好新鲜，质感细腻，入口即溶。当中有些口味偏淡，有些偏浓郁，各有特色。
♢ Appetizer | 前菜三点
师傅将3款前菜放系一个木盒内，入面有砂石﹑红叶装饰，赏心悦目🥹
➊ 帆立贝 ‧ 炙烧过后香气逼人，口感厚实又滑身，底下有片昆布颇脆口。
➋ 云丹白明太子白虾 ‧ 唔食生蚝可转富山湾白虾，质感绵滑，鲜甜爽口，带有明太子味道。加上海胆﹑黑鱼子，简直多重享受！
➌ 北海道毛蟹 ‧ 完整一片蟹肉，真材实料！肉质饱满而鲜嫩，内有柠檬啫喱提味，清新酸甜。
♢ Steamed Dish | 虾夷鲍酒蒸
餐厅以清酒中既绝顶佳酿——十四代搭配鲍鱼，诚意满分💯 店员会用酒樽喷几下sake系鲍鱼上，散发清淡酒香。虾夷鲍产自北海道，肉质饱满，蒸煮过后入口软腍，配上鲍肝酱﹑紫苏叶，味道更上一层楼。而伴菜有宝塔椰菜花，加上日本食用花穗点缀，卖相精致。
♢ Sashimi | 季节刺身五点
首3款刺身放系一个山景盘子上面🗻 用干冰营造喷烟效果，好有意境！
➊ 带子 ‧ 肉质饱满，非常新鲜滑溜！加左珍贵既「雪之结晶」淡雪盐调味，轻微提升带子鲜味，建议唔洗再点豉油。
➋ 牡丹虾 ‧ 虾肉晶莹剔透，口感细腻爽滑，鲜味十足。
➌ 𫚕鱼 ‧ 正值当造季节，比油甘鱼味道更浓郁，油份更重。顶层系腩碎，以京葱搅拌，中和腩位既油腻感，味道平衡得好好。
➍ 超拖罗/赤身 ‧ 先食超拖罗，油脂满满，入口即溶！而赤身放上手磨芝麻同葱花，香气四溢。
➎ 安拖罗 ‧ 微微炙烧后逼出丰富油脂，鱼香浓郁，加左淡雪盐﹑芥末调味，爽脆紫菜夹上紫苏叶，中和拖罗油腻感，口感丰富！
♢ Pot Dish | 鳕场蟹亀甲锅
食到中段黎一个汤物暖身，今次主角系「蟹中之王」——北海道鳕场蟹🦀 系帝王蟹中最优质﹑名贵既品种。完整一条蟹肉真材实料，肉质肥美饱满，啖啖肉好满足！店员介绍个汤系用左昆布加大量蟹壳熬制几个钟，汤头看似清淡，但系蟹味好浓郁，味道够鲜甜！除左蟹肉，仲有冬菇﹑草菇﹑绍菜包波菜卷，吸收汤汁精华后超正🤤 值得一赞既系汤物以明火上菜，更加用亀甲锅(铝锅)盛载，保持温热，非常贴心！
♢ Sorbet | 季节雪葩
开始食寿司前以柚子雪葩清一清味蕾。雪葩质感绵滑细腻，散发淡淡自然柚子清香，唔会太甜，非常醒胃。
♢ Sushi | 精选寿司五贯
最钟意寿司既环节🍣 望住师傅由切鱼生﹑握寿司﹑调味每个步骤都认真制作。
➊ 油甘鱼 ‧ 正值当造，新鲜爽口，加左新鲜紫菜﹑手磨芝麻调味。
➋ 深海池鱼 ‧ 味道鲜甜，口感爽脆，鱼味浓郁。
➌ 地金目鲷 ‧ 较多油份，炙烧过后逼出丰富油脂。
➍ 鲛鲽 ‧ 肉质细嫩，上面放左肥美既裙边位，炙烧后充满油香。
➎ 北寄贝 ‧ 来自北海道，加左青柠汁﹑柚子皮调味，口感爽脆清新。
♢ Main Dish | A4宫崎牛厚烧
店员捧住一大个黑色煲上菜，煲底放左大量日本禾秆草🌾 用火枪烧过后可以营造烟雾效果，非常梦幻！3件A4牛肉细致软腍，入口即溶，而且宫崎牛既味道系特别浓郁🥩 牛肉上加左自家制忌廉牛肝菌酱汁，再渗入禾秆草香气后带有烟熏味道。而配菜有芦荀同西班牙串茄，烧过后同样非常香口。
♢ Rice Dish | 特浓上海蟹拌后文稻亭
后文稻亭乌冬配上松叶蟹整成既芡汁，配上明火大闸蟹蟹粉，奢华程度认真夸张💫 乌冬比较幼身，口感烟韧，将蟹粉加到乌冬中捞匀，蟹味非常香浓，每条乌冬都挂满芡汁，超正！餐厅另外附上意大利黑醋，有3款唔同甜酸程度可供选择，随个人喜好添加，不得不赞餐厅既专业同细心！
♢ Dessert | 和风雪糕拿破仑
最后一道菜，师傅即制甜品，亲手唧cream👨🏻🍳 平时omakase既甜品多数都系雪糕，今次睇得出餐厅对食物既追求，坚持新鲜制作！拿破仑口感酥脆，中间夹左忌廉同椰子雪糕，富有层次感。整体口感清新，有助消济。连甜品都咁用心制作，呢餐Omakase简直完美😌👍🏻
餐厅服务值得一赞，成个过程都轻松愉快。师傅具备专业知识，功架十足，不时同我地交流，系师傅身上学到唔少知识~ 亦都睇得出师傅对日本菜既热诚。另外店员上菜时都好细心讲解，有问必答，真系了解过d食材，睇得出系well-trained。今次omakase体验非常满意，系好难忘既一餐生日饭🥰 绝对会再访✅
张贴
