影片
更多
2022-09-29
10 浏览
近年omakase大行其道，今次去试既呢间系位于中环既"赏樱"(好好听既名~)门口黑黑的一大道门咁，只有简单的细细招牌，稍不留神真系会走过左都唔知。厚黑的倘门打开后，就系一条旁边挂上了日式挂画的细长通道，好似走进神秘的通道，然后通往享受一场梦幻精致既飨宴。餐厅格局高尚、清幽、典雅，只有10个左右的bar枱位置，所有客人都可以欣赏到师傅既手艺，亦可以随时与师傅交流。一坐得就俾左一碟鳕鱼干我地，脆卜卜、松化，浓味。"赏樱"既dinner omakase，有3个选择:《寿司十贯》$1380、《花》$1680、《见》$1880。我地㨂左《花 Hana omakase》: 剌身四皿、 一品料理、 寿司六贯、汤、甜品。今日serve我地既师傅系炜师傅，首先细心了解每位客人既饮食禁忌／敏感，然后就开始今晚既omakase。个menu无写，原来呢个Hana omakase都有前菜。前菜🍱一个木盒上，师傅讲解，由左下食起，依次序:🌸1.天妇罗鸡泡鱼: 超脆外层，鱼肉丰厚，咸鲜十足🌸2.炸白虾:卜卜脆,又新鲜,虾仔细细,虾味好浓郁🌸3.莼菜伴海胆马粪: 师傅讲解，莼菜呢种食材，本身因为要保护自己，所以会有
今次去试既呢间系位于中环既"赏樱"
(好好听既名~)
门口黑黑的一大道门咁，只有简单的细细招牌，
稍不留神真系会走过左都唔知。
厚黑的倘门打开后，就系一条旁边挂上了日式挂画的细长通道，
好似走进神秘的通道，然后通往享受一场梦幻精致既飨宴。
餐厅格局高尚、清幽、典雅，
只有10个左右的bar枱位置，
所有客人都可以欣赏到师傅既手艺，亦可以随时与师傅交流。
一坐得就俾左一碟鳕鱼干我地，脆卜卜、松化，浓味。
"赏樱"既dinner omakase，
有3个选择:《寿司十贯》$1380、《花》$1680、《见》$1880。
我地㨂左《花 Hana omakase》: 剌身四皿、 一品料理、 寿司六贯、汤、甜品。
今日serve我地既师傅系炜师傅，
首先细心了解每位客人既饮食禁忌／敏感，
然后就开始今晚既omakase。
个menu无写，
原来呢个Hana omakase都有前菜。
前菜🍱
一个木盒上，师傅讲解，由左下食起，依次序:
🌸1.天妇罗鸡泡鱼: 超脆外层，鱼肉丰厚，咸鲜十足
🌸2.炸白虾:卜卜脆,又新鲜,虾仔细细,虾味好浓郁
🌸3.莼菜伴海胆马粪: 师傅讲解，莼菜呢种食材，本身因为要保护自己，所以会有一层薄膜覆盖，呈啫喱状，质地滑浖浖，用筷子系夹唔起。所以进食时要好似饮酒咁连埋海胆一啖饮晒。清新既莼菜，更托显海胆鲜味。
🌸4.黑梅贝:其实系一种日本东风螺，肉质弹牙
唔好忘记，以上，只系前菜黎咋!!
已经好丰富精致!!
刺身四皿
一、水母刺身‧松叶蟹冻配马粪海赡‧北寄贝‧赤贝
摆盘好靓好精致，左上角既萝卜雕花尽显师傅功架，见到已经好心心眼既刺身一皿。
💮水母刺身
纯天然，晶莹透亮，口感弹牙爽脆，蘸上芝麻、酸汁，味道清新开胃。
💮松叶蟹冻配马粪海赡
个松叶蟹冻制作用心，用上蟹肉、蟹膏、蟹水去整，
连马粪海胆一啖食落去，
蟹同海胆既鲜味系口腔浓郁地爆发!
千祈唔好点豉油/wasabi
💮北寄贝
师傅配上青柠汁，唔使点其他，突显甜味﹗
完全系爽、鲜、甜、清
💮赤贝
系比较浓味既贝类
以上睇落已经有几味刺身，不过，呢度原来只系算一皿!!!!
刺身继续陆续有黎…
二、北海道生蚝 伴柚子酸汁啫喱
只生蚝超级大只﹗
为方便进食，师傅先切开一分二奉上。
生蚝上面伴以柚子酸汁啫喱，
酸酸地，同生蚝味好夹﹗
生蚝肉质肥美creamy，淡淡海水味。
三. 白鱼真鲷卷•𩽾𩾌鱼肝•牡丹虾配 帆立贝伴海胆粉•天然鲭鱼•水果蕃茄
💮依次序，首先系食右下既白鱼真鲷卷。
真鲷薄切，入面卷住toro蓉，
上面配以金色飞鱼子。
师傅分享，呢个系唔系一般平时食开嘅飞鱼子。
佢呢个系无色素添加，粒粒分明、晶莹剔透。
唔系鳟鱼籽会痴埋一齐，又或者多春鱼子/蟹子咁实色。
💮第2系右上既𩽾𩾌鱼肝。
制作繁复：首先要去衣，再烧血管黎辟除腥味。由于储存雪藏过， 师父喺serve之前，用火枪烧下，令鱼肝回复温度 ，有利油分带出。
处理过嘅𩽾𩾌鱼肝，油香味浓，完全冇苦味，
配上萝卜蓉加少少辣椒，
丰富口感，美味。
💮然后就系中间嘅牡丹虾同帆立贝。
牡丹虾头已清虾膏，放咗喺虾身上面，
完全唔使落豉油，味道鲜甜。
帆立贝好有特色！
表面馔满甘鲜生甜的海胆粉。
海胆粉系用新鲜海胆，炒干然后造成，绝对是心机食材。
💮接著按顺序，就系食左下既天然鲭鱼。
平时多数都系食醋鲭鱼，
今次呢个系天然鲭鱼，酱油渍制，
师傅略烧处理，完全唔同平时既醋鲭鱼。
千祈唔好点豉油/wasabi,要好好享受天然鲭鱼既鲜美！
好浓味，肉质又滑！
上面既系山芋蓉，类似淮山既食物，
制成蓉，呈粘稠浆液，含有丰富纤维，对肠胃有益，食个omakase都食得健康😌😎
💮最后系右上既"水果蕃茄"
甜度8，甜到归属水果类。
轻点岩盐，更带出甜味。
四.紫菜包拖罗
呢度好有心思，唔系简单嘅就咁紫菜包一片拖罗，每样细节都好细致讲究。
首先除左紫菜之外，佢仲加咗一片黄豆纸，用以隔开油份，保持紫菜爽脆。
入面既拖罗，采用嘅系一片中拖罗+一片吞拿鱼露天。
中拖罗预先用岩盐、紫苏叶、wasabi茎制成既渍物调味，渍物好有wasabi香气，而唔辣。
大拖罗用吞拿鱼脑天，
脑天生食会有根，咬唔烂，处理上需要顺根切，或者烧。
师傅用火枪略烧脑天处理，
使外面焦香，中间保持生嫩
入口简直多重享受，好似一个精彩既协奏曲咁！
🐟一品料理
已经觉得超级满足，
原来只系完成刺身部分，继续落黎既系熟食-汁煮子持香鱼。
师傅介绍既系当造既"子持香鱼"
所谓“子持”， 顾名思义即系有bb咁解，
类似多春鱼咁，鱼腹内有鱼春。
个汁以鱼头鱼骨熬成，鲜甜无比。
子持香鱼食香叶，所以有独特既鱼质香味，鱼肉质绵。
鱼腹入面仲有鱼春、鱼润。
鱼骨原来仲可以食埋。
寿司六贯
系呢个环节，姜系不可或缺嘅，
担当寿司之间嘅味道清道夫。
"赏樱"连姜都讲究到，用既系日本沙律姜，可生食，比子姜嫩、无渣。
师父讲解畀我哋知，唔好睇小呢嚿姜，处理步骤都好繁复：
要用细细流水“啤”水一晚，以去辣味，
再分两次浸甜醋,腌2、3日，
爽甜无渣。
寿司用上赤醋饭,
赤醋需要时间酿制，
色啡、醋味香， 唔系普通一味酸，
整sushi饭既技巧都多d，
打唔混既话d色就会唔靓。
师傅细心，可能知道女士呢个moment都已经饱饱哋，寿司可以少饭。
饭加左wasabi，wasabi的份量亦可跟师傅沟通
🍣1.伊佐目
亦称鸡鱼。
调好晒味,淡味既白身鱼。
🍣2.北海道天然野生鲛鲽鱼
亦即系右口鱼
左口鱼通常养殖，淡口，油分轻
处理真鲷、左口要雪1、2晚，放松神经肌肉，肉质先松软
而鲛鲽鱼，本身鱼肉就嫩滑d。
今次师傅好精彩地，一件寿司用上一条鱼2个部位-鱼身、鱼裙边。
鱼身鱼味浓郁，
鱼边油份重，经烧灸过，更添焦香、浓郁甘香！
一次过已经食齐鱼嘅两个部位，精彩！
🍣3.银鳕鱼配明太子（鳕鱼子）
重油分，独有银鳕鱼味
🍣4.酱油渍鲣鱼配醋面豉，芝麻粉
鲣鱼其实一年四季都有,
不过鲣鱼四季食既野唔同，所以味道都会唔同
鲣鱼鱼质结实，味浓，带少少烟熏味
🍣5.黑鯥 配白松露
肥美滑嫩鲜甜、油质重无渣，
好突出的清新鱼味。
🍣6.赤海胆
赤海胆厚身、浓郁、鲜甜，
师傅好特别，
用左“矶之雪”压成既类似蛋挞纸托既小盘咁盛载海胆上桌。
“矶之雪”系用昆布加米浆造既一张食得既纸咁，
脆身爽口，放耐左都唔痴口、唔韧。
连埋海胆一齐食。特别！
🥣汤
面豉汤，仲要有大大只鲜甜弹牙既虾！
🍰🍈甜品
甜品都好慷慨有2款：
静岗蜜瓜、朱古力蛋糕
朱古力蛋糕特别之处系配以分子料理云呢拿味鱼子。
系师傅好有心机，每一粒都系人手一滴一滴整出黎！
净系呢d云呢拿味鱼子，师傅都预先整左1个钟头以上！
总结一下,
呢个omakase,
真心无比精彩！
每个细节都尽显功夫、技巧、用心、惊喜！极级享受！
绝对大推！
张贴
