Poking

平日经常过嚟上环呢边揾食 ，贪佢呢度多唔同种类嘅小店， 每次过嚟总会有新嘅惊喜。今日经过 poking，见佢出面楝咗个易拉架， 主打营养沙律， 配搭各种鱼肉豆类，糙米藜麦饭，望落几新奇健康。 系好奇心驱使下，就走咗入去一试。店舖以白色同埋浅木色为主调， 环境清幽。 可惜座位都比较窄，比较适合独自或者情侣朋友两人过嚟食。Salmon the Classic里面有唔少嘅三文鱼切粒，配以牛油果，青瓜，青葱，同柠檬。 粗略估计有成十三四粒三文鱼切粒， 每粒入口都丰腴嫩滑， 味道浓沃，唔会话淋pat pat 好多筋。饭底可以拣净寿司饭，净糙米饭 ，或者沙律菜配一种饭。 我拣咗沙律菜寿司饭。 碗饭送到上嚟台面𠮶时吓咗一跳，啲𩠌堆到满一满，好似一座绿色嘅小山丘咁， 上面仲撒咗啲芝麻碎， 淋上酱油麻油同埋醋， 食落高蛋白质之余又完全唔会觉得有负担。 三文鱼同埋牛油果所带嚟嘅油脂感满足咗我食肉嘅需要， 沙律菜同埋醋呢个配搭啱啱好中和咗油脂感， 食落非常之饱肚， 好满足。卖单承惠108蚊， 系个好好嘅体验。