留家廚房

营业中

休息中

庆祝生日约咗朋友嚟食留家厨房，本身约夜晚，但又停晚市堂食，唯有改食午市变咗饮茶。餐牌上选择都好多，第一次嚟所以嗌咗啲招牌菜留家烟熏鸡同太史戈渣。叉烧都系招牌菜，我哋都好有兴趣，但侍应只答一句「而家无㖞」。唔知系𠮶日卖晒，还是午市无供应，唔明佢咩意思…首先上枱嘅系留家烟熏鸡，一上枱就闻到好香烟熏味食落带烟熏味嘅卤水非常香。鸡皮薄，脂肪唔会太多，鸡肉嫩滑，就连鸡胸位都好滑完全唔鞋用上新鲜鸡所以有埋鸡肝同鸡肾，鸡肝甘香，鸡肾爽口，两样都好食另一招牌菜 - 太史戈渣，以高汤加鸡蛋再上粉炸成，系个好花功夫嘅菜式。食时加啲白砂糖喺面，表面酥脆，味道好似玉子豆腐，同样口感滑溜，但就多咗高汤嘅味道。苔条九肚鱼粉浆够薄，炸得非常酥脆，而且唔油腻内里九肚鱼嫩滑鲜味，带点海苔嘅香味。炸到金黄色嘅虾多士卖相好靓，食落多士酥脆唔油腻，虾肉鲜味有弹性星期日限定嘅三色带子饺造型精致，表面橙色系蟹籽，黄色绿色分别系粟米同菜粒。内馅除咗有带子仲有虾肉，虾味比带子味道更突出。火鸭丝肠粉皮厚薄适中，中间夹住好多火鸭丝，好足料芋角比起一般无咁油腻，内馅芋泥绵密，好好味凤凰煎米鸡系煎嘅糯米鸡，表面煎到微㶶，口感同煲仔饭饭焦相似