燚 (已改名) 查看

最近公司加人工，所以晏昼同事就带我嚟咗呢间隐世铁板烧食午餐，平时经过门口真系唔知呢间系铁板烧餐厅，因为门口都几神秘。餐厅面积唔算好大，只有两张枱同吧枱，今次朋友负责发板 😌 自己就负责食。食物未嚟之前就叫杯啤酒 Chill 吓，炎炎夏日饮番杯透心凉嘅麒麟啤当堂舒服晒。烟三文鱼包住沙律菜，伴碟仲有味道酸酸嘅果醋泡泡，清新健康又醒胃。咸香味十足嘅巴马火腿配上乳酪同菠萝酱，呢个配搭相当新颖，味道层次相当丰富，估唔到都几夹。大虾煎嘅火喉控制得非常好，入口肉质嫩滑弹牙。超钟意食鹅肝嘅我，见到呢件鹅肝真系顶唔顺 🤤 劲厚切又大件，厨师特意系浓郁嘅鹅肝下面加上菠萝酱，中和鹅肝带嚟嘅油腻感。牛柳同猪扒同朋友share一齐食，澳洲牛柳拣咗五成熟，牛柳肉质粉嫩多汁，牛味相当浓郁。日本宫崎猪扒相当有惊喜，估唔到肉淋而不韧，旁边仲提供两款酱，食多几件都唔觉滞，牛柳同猪扒伴碟嘅蒜片炸得超香口超好味。最后食埋热辣辣嘅炒饭非常满足又饱肚。