尚夢・茳煳 (已結業)

最近听朋友讲谭臣道开咗间新派嘅中菜餐厅，所以今日放工就同朋友嚟咗试试，餐厅环境舒适之余相当干净，而且冷气都非常够，坐坐下重有啲冻添 😂 洗手间亦非常雅致同干净，大致上非常满意，之后就试埋啲食物质素。餐牌超级多菜式，谂住想试试皇牌菜红烧牛脸肉，不过同事想食龙趸多啲，所以牛脸肉留返下次先食。味道浓郁而且非常足料嘅炖汤系杞子淮山鸡汤。六件香煎龙趸球，件件都啖啖肉超级正，肉质非常之鲜嫩，食完返唔到转头。尚梦终极小炒皇果然无改错名，用左好多贵食材，有虾干、珊瑚蚌、带子同其他配料，所以食起嚟相当惹味。茳糊炒饭相当有特色，用咗菜甫、蛋白、杞子等材料炒成，味道出奇地相当有惊喜，出面食唔到嘅味道。最后食埋餐厅自家制嘅芝麻糯米糍，为呢餐高级中式晚餐画上句号。