洋食商店 (喜遇)

营业中

休息中

朋友知我钟意食日式居酒屋，所以带咗我嚟呢间喺长沙湾几高人气嘅西日居酒屋，餐厅门口摆设同内里装修都非常富有日本色彩。餐厅主打寿喜烧套餐，如果唔钟意食寿喜烧，另外都会有单点食物，而且种类都几多。我哋拣嘅套餐有岩手县和牛、美国牛颈脊同鹿儿岛茶美豚三款肉，三款肉煮好后再配埋蛋汁，口感细腻柔滑，肉汁饱满新鲜，而且职员全程帮你煮埋，自己安心等食就可以，服务非常好。之后再喺锅加入寿喜烧汁煮蔬菜，蔬菜吸收咗肉汁同寿喜烧汁，食落更加清甜。到左最后会为你加入炖饭，等个饭收水就可以食得，米饭粒粒都沾满咗酱汁，而且带有阵阵黑松露味，味道甜甜地几得意。串烧拼盘足足有六款食物，自己最钟意食烧腩片，肉味浓郁油香满溢，其次就系海虾同鸡翼，两者都非常入味。套餐可以喺十几款小食当中拣两款，我哋拣咗玉子烧同和牛可乐波配黑松露酱，玉子烧加上沙律酱炙烧后再加埋蟹籽，食落脆卜卜又软嫩，口感层次丰富，而可乐波用薯仔、洋葱同牛肉混合整成，口感外脆内软，味道咸咸地。估唔到开心果草莓芭菲咁吸晴，除咗有两个雪球，仲有蝴蝶酥、泡芙、果仁粒等配料，层次非常丰富，真系睇得又食得，呢个甜品必点。