山東餃子館 (已結業)

呢日同事懒唔想出街，所以lunch要我买埋外卖返嚟喂食😒。由于外卖自取app有优惠，所以喺app到落单再去拎。餐厅位置喺元州街，隔离几间舖都唔系食肆，所以唔多起眼。一去到外卖就已经ready，但个收银阿叔礼貌唔多好。麻酱鸡丝粉皮($34)，凉拌小吃嚟讲份量算非常多！🐔鸡丝多到一个点，非常慷慨，真系每一啖都食到。麻酱亦都唔算腻，唔系太杰𠮶种，捞埋凉皮食好正。啲粉皮好得意，一卷卷的，唔系平日河粉状咁摊平。西洋菜鲜肉水饺($36)，食饺子有得拣，我一定拣西洋菜💚。如果要净饺子，就有10只，饺子面，就有5只；叫煎饺就加多$3。我哋要咗净饺子10只🥟(无汤的)，本身惊放耐咗啲皮会痴埋一齐，好彩无。饺子皮滑、厚度适中，无爆馅，西洋菜味浓郁，点埋醋食，真系唔错👍。总括嚟讲，因为食过今次外卖，我认为系可以嚟堂食下，虽然环境望落一般，但都正常，好似唔系太差。今次食呢两样食物都好食，特别系麻酱鸡丝粉皮，真心推介，如果喺夏天食，更加不得了😋！饺子馆定价非常相宜，平均都系$3x，绝对系抵食之选。