越棧越式湯粉專門店 (荷里活廣場)

营业中

休息中

去荷里活广场行街街，想话食返个下午茶，天气好冻，唔想食面包蛋糕咖啡𠮶啲，就去咗呢间越栈𠮶度食碗粉。$40一个下午茶餐，跟饮品，特饮加$4。食品选择，香茅猪扒，鸡翼，生牛肉之类的都有，全部都可以配汤檬/捞檬/金边粉/饭。我拣咗一个胡椒猪肉金边粉，配椰汁三色冰（走甜），冇错，佢嘅椰汁三色冰竟然系可以走甜，即系佢𠮶啲豆本身系冇用糖一齐煮，而后尾先至加糖水落去饮品度。虽然餐牌话下午茶系轻食份量，我就觉得同平时喺街食一碗越南粉系差唔多大，冇叫到扣底，我都食唔晒碗粉。胡椒猪肉我都系第一次食，佢同香茅猪扒有少少似，但系有好浓好香嘅胡椒味，都几好食，值得一赞嘅系佢个汤底，牛骨汤底好清甜，食完又唔会觉得好口渴，$40响商场食个下午茶来讲，算系交到货。杯椰汁三色冰，真系有走甜，可惜啲豆就少得可怜，又多冰，椰汁味都几淡，而且𠮶啲红豆绿豆同埋啫喱条全部都系好硬，未煲淋。