759雲吞麵 (已結業)

今日又要外出，所以相約同事一齊食個早餐先！走咗出長沙灣地鐵站，只係見到一間759雲吞麵，於是就睇下有冇早餐！雖然有早餐食，但選擇唔多！都係一般嘅粉麵餐，仲有三文治餐同扒餐！十一點後會有粉麵同飯類。我叫咗沙嗲牛肉米粉，米粉值得一讚很彈牙爽口，就算已經俾我浸咗成十分鐘都仲係好爽口！食得出本身個沙嗲味應該幾濃，不過沙嗲牛肉嘅份量就少咗d，所以個湯嘅沙嗲味唔係好夠！牛肉都唔錯夠腍身！粉麵餐配有火腿奄列及牛油方包！火腿奄列火腿份量都算係咁，唔會只係得幾條火腿。而奄列亦冇煎得過熟，仲有少許蛋汁！茶走好夠茶味，不過就有少少苦澀同唔夠滑，顏色亦深咗少許！同事叫嘅早晨扒餐，吉列豬扒牛油多士配炒滑蛋，凍奶茶！吉列豬扒加咗2片青瓜，感覺有誠意！