天丼てんや

营业中

休息中

个人好钟意食天妇罗荞麦面，每年去日本玩都一定至少食一餐，听朋友讲话呢间嘢好掂所以特登过嚟试吓。星期六lunch hour, 排队一个钟左右有位都算ok嘅，排队𠮶阵前面同后面个family都系讲日文，心谂如果连在港日本人都慕名帮衬应该冇伏。果然，井饭方面，size大份抵食，米饭食得出系日本珍珠米，湿润饱满软硬适中; 天妇罗炸得干爽唔油腻，粉衣够薄身，食材新鲜，海鲜唔腥，鸡肉肥美，蔬菜不带草青味; 荞麦面就红汤同白汤都有试，白汤清爽，红汤浓郁，荞麦面真心推，口感似手工制品，弹牙爽口真系有荞麦香。个人推荐天妇罗荞麦面套餐配白汤。最后不得不赞吓啲员工嘅工作态度，好笑容又亲切，难得仲好有耐性，隔离枱有个婆婆同孙女对点餐有啲问题，有个几后生嘅女店员好细心咁解释点餐流程，又指出几个比较受客人欢迎嘅套餐畀两婆孙参考，真心赞。