Ember (已結業)

喺铜锣湾行完街，行吓行吓见到呢间西餐厅装修咁靓咁别致，就同朋友入去试吓佢，发现原来佢并唔系虚有其表，嘢食一样咁出色。我同朋友一人叫咗一个set dinner。头盘先系一个自家制嘅面包，跟住就系南瓜餐汤，香蒜辣椒煎虾，Beef Wellington，同埋自家制嘅开心果雪糕。先讲吓佢哋自家制嘅面包，面包非常松软，亦都散发着阵阵嘅香味，配埋牛油热辣辣咁食真系食得出系水准之作。跟住个餐汤饮得出系用好多南瓜去打嘅，浓浓嘅南瓜味加埋海鲜真系非常夹，亦都非常甜。跟住到个蒜片辣椒煎虾 ，浓郁嘅蒜香味同埋少少辣辣地，配埋非常新鲜嘅虾真系天衣无缝，一再回味。威灵顿牛柳完全唔需要讲太多，简单来讲就系做到应有要做嘅嘢。酥皮够脆，切开唔会散，有自家制嘅蘑菇酱同埋风干火腿，𠮶阵咸香味带返出牛嘅味道，火候控制得啱啱好，绝对值得一试。甜品亦都系主打嘅自家制开心果雪糕，食落去系有开心果仁嘅口感同埋好香嘅开心果味，亦唔会太甜，所以避免左太腻嘅感觉。