一品齋甜品屋 (已結業)

飲食雜誌曾多番介紹，一直都想試試這間中式糖水店，是夜到禮頓道yogo食Froyo後，當然要轉個彎到一品齋繼續甜品part 2。門面一點也不起眼，尤其晚上附近店鋪也關門，整條街人煙稀少，與yogo形成強烈對比。店鋪裝修簡單，明顯是主打街坊生意，只有３、４張小枱，人多的話，就要加摺枱坐出門口了。牆上貼滿了不同報紙雜誌介紹的剪報，特別的是連成龍陳年簽名海報也有！糖水種類不多，以傳統糖水如紅綠豆沙、豆花、湯圓、涼粉等為主打。當日天氣勁熱，點了冰涼的鮮果涼西&凍腐竹銀杏。腐竹銀杏($14)一上枱心裡已暗笑，是我喜愛的煮法，和兒時婆婆自家煮的一樣，腐竹銀杏的腐竹完全"溶"在其中，不像很多糖水鋪般，腐竹碎和糖水是分開的，沒有豆香只有甜味。因為已完全溶化關係，好像飲緊一杯香滑又豆味濃郁的豆漿！！！仲有銀杏大大粒，薏米亦粒粒煙韌有咬口，果然火喉十足。鮮果涼西($25)碗細細但份量十足，今日鮮果有我最愛的西瓜，西瓜當造~超甜又多汁，有些仲起沙tim~~~ 而涼粉又夠彈牙，比一般的重涼茶味，相比之下，西米就顯得普普通通。這間一品齋絕對是質素高又誠意可加的小店，要支持支持！