【另類過大海之旅】教你匿喺澳門嘅酒店食一日－菠蘿豬扒包係咩嚟？

話說上回就講到小編去咗澳門嘅Studio City(重申，即係李安納度去開幕嗰間酒店/麥當娜開Show嗰間)，一去到入咗條「澳門食街遊」食咗餐大排檔小菜（重溫：http://bit.ly/1Qr5Oh6），食完之後我開始有啲後悔，唔係因為唔好食，係因為太好食食得大飽，原來呢條街仲有好多嘢食，無辦法，呢個時候唯有拎出我第二個胃繼續食餐勁！

熱辣辣葡撻

去到澳門話就話唔想再去啲名勝，但食方面就例外，去幾多次你都係想食下葡撻、杏仁餅等等嘅，你以為酒店一定食啲高級嘢，點知呢度竟然有葡撻呢啲平民嘢，仲要唔係來貨，而係自己整，呢個時候你又會問靠唔靠得住？放心，呢度嘅葡撻係跟足傳統配方，係街頭味道，蛋漿香滑，面頭一樣焦香，撻皮鬆化，絕對同外面嗰啲係有得揮！

鮮果雪糕三文治

澳門雪糕三文治最出名當然係禮記，一來歷史有返咁上下，二來佢哋啲雪糕又係自家製，真係好少有，估你唔到呢間酒店都有雪糕三文治食，雖然無懷舊鋪面，不過論食物質素，一啲都唔失禮，佢哋啲雪糕都係自家製新鮮製，無人造色素或防腐劑，有成8款味道，包括朱古力、雲尼拿、班蘭，仲有必試嘅鮮果味，好似士多啤梨、芒果、椰子菠蘿、番石榴，食落係好Fresh，好滑，無嗰種好假嘅甜味，食得出係果香。

一塊豬扒三種包

澳門另一代表美食又點會少得豬扒包呢，呢度嘅豬扒包亦都勝在有得揀，除咗較Common嘅硬豬仔，你仲可以選擇軟包，最特別就梗係試菠蘿包夾豬扒啦，你以為怪怪哋，但食落又幾夾，豬扒厚薄適中香口加埋脆皮菠蘿包，咸中帶甜，而且個菠蘿包係唔會好散食到周圍係，中間仲有蕃茄同蔬菜好足料，令你食完咁大個包都唔覺油膩，呢個可能貴過出面少少，不過你出去搭埋車都差唔多啦！

大大個靚麵包

有時早餐唔一定想食一份Full Set ，或者自助餐，呢度都有一間西式麵包店，入面款式好多，每個包都由法國師傅朝朝新鮮焗製，全部都好大個，漲卜卜，好有光澤，睇樣已經令你好想食，聽講有啲Ham &Cheese牛角包係好好食，有好多Ham，個包好鬆化，食一個可以當一餐Lunch！

飯後甜品－日式班戟

如果仲未夠喉，我講緊女仔，想餵飽佢哋第八個胃，可以食多個日式班戟，又係即叫即整，加啲朱古力醬、芒果醬、班蘭西米，一啖多重口感，食完就返去瞓個晏覺就超滿足～～

一條街咁多嘢食，淨係食勻咁多間都食咗半個下午，你話使鬼出去玩咩，我仲有好多正嘢未同你哋分享，下回再分解！

文: Marcus
編輯：macau@openrice.com

隨時接收最新資訊
讚好OpenRice專頁！