影片
更多
2011-02-11
90 浏览
早前于佳节好评大赏有幸赢取澳门之旅，先要在此再多谢支持投票的朋友，把握今次免费旅程机会，我希望可以将澳门之行食到的都给大家分享，可惜撞正春节假期，多间目标食肆仍未启市，可以话系出师不利。幸好今次有机会可以食到当奥丰素1890意式料理，呢间荣获南意大利米芝莲星级餐厅最高评价，果然系非同凡响，亦系我目前食到最高水准嘅意大利餐厅！当奥丰素1890意式料理位于新葡京酒店三楼一个角落，由于餐厅座位不算太多，建议先预订位置。而网上除设有订位服务之外，大家更可以先预览一下餐单菜式及价钱，非常方便。今次我订位到来食午餐，记得我电话订位时，侍应再三提醒男士唔好著短裤，亦唔好著露趾凉鞋，不过圆领衫跟牛仔裤系无问题，相信主要只系提醒酒店住客进场唔好著得太随便。餐厅环境布置得相当华丽，虽然楼底唔算高，但精致嘅吊灯及壁上油画别具气派。突然觉得眼前画面跟杜拜Burj Ai Arab房间极为相似，甚至餐具亦同样用上Hermes出品，后来才知道两者同出自著名室内设计师Khuan Chew手笔，怪不得有似曾相识嘅感觉。每一张大餐台之间有相当嘅距离，私隐度可以更高之余，感觉亦格外高贵。每张台上都放有一款唔同嘅摆设，虽然我
当奥丰素1890意式料理位于新葡京酒店三楼一个角落，由于餐厅座位不算太多，建议先预订位置。而网上除设有订位服务之外，大家更可以先预览一下餐单菜式及价钱，非常方便。今次我订位到来食午餐，记得我电话订位时，侍应再三提醒男士唔好著短裤，亦唔好著露趾凉鞋，不过圆领衫跟牛仔裤系无问题，相信主要只系提醒酒店住客进场唔好著得太随便。
餐厅环境布置得相当华丽，虽然楼底唔算高，但精致嘅吊灯及壁上油画别具气派。突然觉得眼前画面跟杜拜Burj Ai Arab房间极为相似，甚至餐具亦同样用上Hermes出品，后来才知道两者同出自著名室内设计师Khuan Chew手笔，怪不得有似曾相识嘅感觉。每一张大餐台之间有相当嘅距离，私隐度可以更高之余，感觉亦格外高贵。每张台上都放有一款唔同嘅摆设，虽然我唔系呢方面专家，但起码知道呢个精美摆设应该唔系一般货色。呢度午餐Lunch Set分两个Courses(MOP280)，三个Courses(MOP380)及Full Menu(MOP480)三种，三个同样都跟甜品。之前虽然参详过前辈嘅午餐攻略，但我地最后都系抱住一人世物一世嘅心态，加上非常肚饿，所以都系叫左一份三个Courses加一个Full Set。
头盘未到之前，先送来一篮香喷喷嘅面包。侍应将六款面包介绍后，再为我地准备特纯橄榄油，芝士味牛油及黑醋。呢款意大利黑醋实在不得不用多少少笔墨去写下，用白葡萄搾汁后，再经过25年古法酿制而成，属Gold Label最高级数。平时我地用来混沙律食嘅黑醋亦只系三至五年货色，呢支用来蘸面包食真系好食到不得了，搞到我唔好意思要求侍应为我再次添加，如果大家有兴趣的话，亦可以将黑醋买走，每支盛惠MOP390。至于呢个价钱去买一支调味料值唔值得，大家试过后心入面应有一个答案。讲返个面包篮先，胡萝卜包，马铃薯包，菠菜包等咩都有，单系闻到阵味都知有一定水准，最后在黑醋诱惑下我每款都有食过。其中最吸引的应该就系上面印有1890字样嘅薯仔包，咬落松软又渗出淡淡马铃薯香味，实在非常好食，怪不得咁多人未食头盘早已饱左一半。
享用完面包篮后，先来头盘"鱿鱼配玉米蓉，芝麻菜及25年陈年意大利黑醋"，芝麻菜即系港人俗称嘅火箭菜，本来我好怕呢种菜果种苦涩味，不过混上黑醋后感觉截然不同，感觉唔错。而鱿鱼属于BB体型，咬落鲜嫩富弹性，加埋底层玉米蓉嘅幼滑质感，整个头盘来得既简单又不平凡。
另一份头盘选择左"地中海章鱼沙律配豆蓉及海蚬云吞"，将章鱼片跟海蚬放在意大利云吞面层，再配上豆蓉作伴，卖相极美，放入口每啖在豆蓉粗糙之中夹杂海产鲜味，感觉实在好美妙。
餐汤方面可以三选一，我一向最怕青豆汤为左加强口感而刻意落太多奶油，呢度嘅青豆蓉汤伴辣根、红虾及猪面颊肉就无呢个问题。汤身口感柔滑讨好，红虾肉新鲜爽甜，呢个组合一红一绿令人相当惊喜。本来豌豆汤唔算咩高贵菜式，但偏偏呢度嘅意大利豌豆汤伴带子就带出不一样嘅精彩。豌豆味道较浓咸，混上汤面上香料，饮落绵密之余，亦带著浓厚感觉，而带子好厚身，咬落鲜甜味美有嚼劲，系我最喜爱果种质感，好味。
Middle Course之中，以呢个意式云吞酿黑豚肉配开心果露最为吸引，卖相虽然只系一般，但日本黑豚肉跟意式云吞得出来嘅化学效果系如此有趣，酿入黑豚肉嘅云吞食落少少似饺子，豚肉味唔算太浓，不过肉香依然，加上云吞皮薄爽滑，实在系高水准作品。讲左咁耐终于到主菜出场，首先系呢份意大利香草羊排配特色薯饼，我一向唔赞成食羊要落薄荷酱，因为薄荷酱味太浓郁，完全抢去肉本身应有味道，所以呢度亦无薄荷酱提供，等你可以慢慢细尝嫩滑羊肉膻香味。特色薯饼中间夹杂茄干，每一啖都食到薯片香脆同埋蕃茄甜味，呢个厨师似乎落左唔少心机，值得一赞。
另一份主菜好多人都有试过，就系呢份牛仔膝配特色意大利饭。除左金黄色嘅意大利饭外，唔好以为炆得入味又够腍嘅牛膝肉系焦点所在。真正主角并唔系佢地，而系最右手面果条牛骨...上餐前侍应特意呈上一只细细只银匙羹，用意系俾你将牛骨入面嘅骨髓取出黎享用。骨髓独特香浓嘅油质，滑入口中果一刹那，虽然有股唔系个个都可以接受嘅牛膻味，但实在系美味无穷，非常好味。牛骨髓属于高蛋白、低脂肪而且极富钙质，营养价值非常高，如果唔食就真系浪费了！
到甜品部份，餐牌上写住呢个热朱古力蛋糕配香蕉雪葩及橘子果酱，唔驶多考虑就决定...要！软心朱古力蛋糕内流著微暖朱古力浆，味道浓郁，绝对系水准以上，但又未算为最好。但香蕉雪葩做得非常出色，蕉味芳香不过火位，混上中间作「桥梁」嘅橘子果酱，Perfect Pair！另一个在Lunch Set甜品当中有个好长嘅名字，就系意式云吞酿香梨、松子、葡萄干伴水牛芝士雪芭及红桑子汁。哗！个名长到...意式云吞内香梨混上葡萄干，清甜好味，最特别都系上面嘅水牛芝士雪芭，口感幼滑，但甜中又带有少少芝士咸味，混埋红桑子汁嘅酸，非常特别。
当奥丰素最具人气嘅甜品"Neapolitan" 脆叶酿玉桂忌廉及樱桃(MOP90)并无出现在Lunch Set入面，意犹未尽之下决定Side Order一客。将Neapolitan酥皮一切落去，已被果种听得到嘅松脆声音吸引住，蘸上樱桃酱后放入口中，一阵阵肉桂香味随香脆松皮涌入口腔，非常诱惑，绝对不试不可！
食过呢餐丰富完美嘅午餐后，侍应引领我到自助甜品吧，每样甜品好有耐性向我介绍，可惜我胃纳有限，未能逐样试清楚。不过，我绝对唔会辜负侍应一番心机，所以点都拎少少返去试下...其中呢个薰衣草味糖果，食落唔觉有薰衣草味，反而有少少姜味，细味之下都几醒神，作为一个终结，实在最好不过！今次当奥丰素之旅，的确系我食过最好嘅意大利菜，用永世难忘亦绝无夸张。所以今次食评篇幅较长亦无可厚非，其实仍有好多想讲想同大家分享，不过...大家都系亲自感受吧！呢个体验，无可能会后悔的！
张贴
