渢竹自助餐 (裝修中)

威尼斯人套票送呢度的自助午餐，虽然系咁，一啲都唔欺场，超得！自助餐最紧要食物补得快，佢绝对做得到，我哋由十一时坐到一时半，啲食物一样咁多！食咗两日，食物有少少变化，推介如下：瑶柱扒西兰花，好好味的瑶柱，唔会得个「献」汁，好味过外面自己单点的！三文鱼，好新鲜！面包布甸，我老公食咗超多，佢话十分极之好食，但我冇食到，太饱！炒蟹，一直都有好多供应，大大只蟹钳，我系怕麻烦，如果唔系一定唔只食一只！露笋炒带子，带子好够味，又大只！甜品都好出色，我建议大家攞啲生果，如木瓜、火龙果之类，再淋啲朱古力酱，佢啲朱古力酱好有朱古力味！咁就当自己食咗朱古力火锅，哈！蓝莓芝士饼真才实料，都好得！比较差的是蜜桃雪糕，太甜。