贏到粥

营业中

休息中

一早已经听闻依间野好多人食，加上佢地好出名嘅wasabi手撕鸡要预早订，所以我一星期前已经上网订左座，店家亦回覆得好快。于是我地准时7:30pm一到餐厅就即时入座啦，可能因为一早预定好食物嘅关系，上菜速度亦非常快！首先，个卜卜蚬锅真系非常有份量，大得好紧要我地3个女仔一望到都好担心食唔晒，不过因为d蚬真系粒粒都鲜味十足，食左几十粒蚬，居然可以无一粒蚬系有沙！真系令我非常喜出望外，食到停唔到口！百几蚊一个锅，质素又高份量又多，非常推荐不过如果唔钟意蒜味就千奇唔好叫依个锅，因为成个汤底都系由非常大量嘅蒜头煲成，蒜味劲浓！至于wasabi手撕鸡，好彩我地只系叫左半只，如果唔系就一定食唔晒，个蚬锅实在太大啦！手撕鸡同样系好有鲜味，最特别嘅系，中间混左d炸到好脆嘅芋头丝，对我依个芋头控来讲，真系回味无穷整体来讲我好满意今餐嘅质素，每人只系百几蚊就食到咁多野，好抵食下次再来一定要试试个冬瓜盅！