蕃茄屋葡式美食

营业中

休息中

有好几日冇写食评，一嚟病病地，咳到就嚟甩肺；二嚟病咗冇心情揾好嘢食。是日终于好番啲，我又再出动。向新马路喷水池附近，有好多好食嘢在街头巷尾，只要行多几步就揾到。今次呢间舖头要行一阵斜路，虽然都只系七点几，但条巷都几静「英英」。舖面小猫三、两只，唔好以为生意麻麻，实情系做好多外卖生意。我叫咗一个行政套餐，包括忌廉鸡皇焗鱼柳连一杯奶茶。本来还可以拣红糙米做饭，可惜刚好卖晒。 冇几耐一碟香喷喷嘅焗鱼柳已呈上台头。奇怪喇，点解冇匙同埋叉？问侍应，原来饭系分开上，仲有配菜添！睇落都几大堆头。配菜系酸菜加青瓜，令人好醒胃。忌廉味唔浓，唔会好似芝士咁特出，适合女士们食用。鸡肉味道不张；鱼柳系吉列鱼柳，加上忌廉汁，又几好味。整体嚟讲，系香但味道又唔会太浓烈，好温柔，好锡住个肚，如果配埋红糙米饭都几健康；奶茶就中规中矩，滑但系唔太香。 一个行政套餐廿八蚊，十分抵食。不过有一个缺点，就系一星期有一日休息，十一月份系逢星期二，下个月都唔知边日休息，要嚟食似乎要撞吓手神至得。