雖然話就話送禮物嘅嘢係講心意，唔使限定咩紀念日或者節日先送。不過聖誕節始終都係送禮物嘅好時機嚟。聽到好多個「聖誕老人」嘅呼喚表示送咗好多年禮物，唔知今年送乜好。所以就特地搜羅咗多款又睇得又食得嘅聖誕禮物畀大家參考下：

可愛系Sanrio糖果禮盒   Sugarfina

呢間精品糖果店聯乘Sanrio家族成員，推出咗多款靚靚嘅糖果禮盒。Hello Kitty、Keroppi、My Melody、蛋黃哥、布甸狗、XO等等都喺齊度，有啲裝住朱古力、有啲裝住薑餅……成個包裝嘅可愛值破表啦！

降姐品牌法式糕點  Junon

張敬軒間法國菜餐廳今年首次推出聖誕禮包，大家都知降姐一出手，啲嘢一定有保證地靚！呢次禮包糕點嘅鐵盒，就特別邀請咗本地著名插畫家郭詠嘉畫插畫，真心靚。三款hampers都有餐廳品牌美酒、自製法式糕點等等，個袋仲可以拎返去餐廳度免費加燙金字，降姐粉是咪好想要？

敏之曲奇限定口味   祝奇餅

呢個手製曲奇品牌，陳敏之都有份投資。趁聖誕就推出咗幾款聖誕限定口味，包括薑餅人、肉桂蘋果批、薄荷朱古力同飄雪紅桑子，幾隻味都好有冬日節慶嘅感覺，連埋靚靚繽紛鐵罐，都幾應節。

KiKi拌麵聖誕老人禮盒     KiKi食品雜貨

聖誕肚餓嘅話，我就煮唔到麵畀你食嘞，送個麵畀你都仲得嘅。台灣人氣拌麵KiKi嘅聖誕禮盒裝有兩款，一款係可愛聖誕老人，另一款係型格黑金特別聖誕樹，分別裝有蔥油拌麵、老醋辣拌麵等同川味牛肉湯麵。

萌爆Line Friends派對雪糕      Häagen-Dazs

如果你身邊有Line Friends粉，都唔使多諗喇，一定係買Haagen Dazs畀佢哋啦。爭在係買勁得意嘅造型雪糕火鍋爐，定係萌萌der冰袋派對套裝啫。兩樣都包埋雪糕，前者就有多包朱古力醬同榛子朱古力醬打邊邊用；後者嘅別注版有季節限定嘅忌廉芝士麻糬同意大利芝士餅麻糬味。

西班牙風味聖誕      Bellota-Bellota

去人哋屋企開聖誕party嘅話，冇奶油兩手空空送梳蕉㗎？呢set 伊比利亞風乾火腿就啱晒，有風乾火腿有豬柳肉；有芝士有亞枝竹芯等，開餐時即場開埋嚟加餸一齊食都得，夠晒開心。

浪漫小王子零食     一田eGift

行到冇晒腳骨力都未揀到禮物嗰陣真心sosad，網上店揀就冇呢個痛苦喇。一田網上店推出咗19款特色嘅聖誕禮盒，送畀日本系朋友嘅揀洋菓子、畀酒鬼嘅就揀派對美酒，當中有個要特別推介嘅，係小王子系列。雖然呢啲零食不過係餅乾或者朱古力等，但淨係小王子個包裝就已經足夠令你冧掂你個friend （女神）啦。

星戰朱古力日曆　馬莎

唔止除夕要倒數，聖誕都要倒數，仲要早成個月開始倒數先開心。收到呢個星球大戰嘅朱古力日曆就最開心啦，日日都可以食粒牛奶朱古力等聖誕。又或者好多小朋友都鍾意嘅呢隻豬仔，都有聖誕版牛油餅呀，好cute cute豬。

酒鬼最愛聖誕精釀     HK Brewcraft

身為一個精釀啤迷，閒時除咗鍾意飲返兩杯之外，仲應該有舖儲樽癮。呢個時候如果有人送set聖誕限定包裝嘅精釀啤酒過佢哋，包保送禮勤一定會得到大大嘅歡心，好感度大增！呢個禮盒有4款獨家啤酒、2隻品酒杯同1個開瓶器㗎，諗咁多做咩？冇人送咪自己送畀自己囉~  飲啦~

復古英國糖果禮物籃　Mr Simms

想送份得體又有品味嘅禮物籃盡顯到心思畀對方？Mr Simms嘅經典英倫糖果聖誕禮物籃就一定唔失禮啦！裡面嘅糖同埋朱古力等，全部都係由歐洲入口，有走成熟路線嘅傳統英式糖果：奶油軟糖或者手製朱古力塊，仲有聖誕卡通造型嘅朱古力同棉花糖棒畀童心未泯嘅你。保證食得又睇得！

瑞士蓮新口味朱古力　LINDOR

一到聖誕自不然諗起 「瑞士蓮軟心朱古力，係朱古力大師嘅傑作」呢句經典廣告。今個冬天，作為經典嘅佢都帶嚟咗新口味，就係大家最愛嘅抹茶！香甜嘅白朱古力外殼包住幼滑甘醇嘅抹茶軟心，呢隻味仲係亞洲market獨有㗎！想聖誕買嚟送畀人，仲有唔同靚靚包裝畀你揀。

本地誠意手作朱古力　Hakawa Chocolate

少數本地非連鎖嘅手作朱古力品牌Hakawa，今年都推出聖誕朱古力禮盒！佢哋嘅朱古力本身都好受朱古力迷推崇。由一粒可可豆，到成品嘅朱古力，都一手一腳落足心血整。手工朱古力要經過非常繁複嘅工序先出到世，仲要產量唔多，呢點絕對係突顯心意細膩嘅選擇呀！而今年聖誕禮盒就有多款口味嘅配搭選擇，例如玫瑰開心果、可可果仁、夏威夷果仁朱古力等，我代表定朱古力控多謝你先~ 

文：Kar