最近小編就去咗開業半年都冇嘅Studio City，即係開幕嗰時星光熠熠，有羅拔迪尼路、里安納度、Mariah Carey等國際巨星撐場嗰間呢，講到咁豪華，唔知入面有啲咩食呢？係咪全部鮑參翅肚架？我驚幾多利事都唔夠喎！
一落船咁肚餓梗係整個快靚正先，入到去就見到有條街寫住「澳門食街遊」，成個格局都幾懷舊，地板都係似澳門啲老街，唔似一般酒店會有嘅豪華設計，不過食嘢又會唔會有返啲街頭風味先？風味呢家嘢唔係話啲料幾名貴，相反係好平民好大眾，一開波就畀我見到有間叫「風味大排檔」，啲檯同設計都跟足出面大排檔咁大膽，就一於先挑一挑機！
趁天氣仲凍凍地，先嚟一個「酸辣乳豬海鮮煲」，一上檯都幾有氣勢，上面有蝦、青口、蜆、乳豬，仲有原隻龍蝦，當個湯一滾起，啲香味就出嚟，個湯底係冬陰功，再加咗蕃茄，酸辣味好平均，首先要食就係乳豬，雖然呢個食法唔係食皮脆，但都唔想太腍，豬肉本身好嫰，食落吸收晒湯嘅香辣味，亦同時為湯底提供肉香，至於海鮮全部都好新鮮，龍蝦啖啖肉，不過估你唔到最正都係個湯，食得辣嘅朋友會好開心，因為個湯越滾會越辣，而且增加咗海鮮嘅甜美，會令人上癮，要食都要快手，呢個煲做到四月三十咋。！
之後我都叫咗幾個小炒，一個係椒鹽龍脷，椒鹽炒得香，有避風塘風味，龍脷炸到好薄好脆，不過如果你唔係好好魚就可轉鮮魷，因為都有啲骨。另外有個葡式豬肉炒蜆，蜆隻隻都好大隻，似花甲，加埋豬肉片配搭幾特別，豬肉似薄片叉燒質感，汁方面就甜甜地，有茄汁，送飯就一流。最後貪得意叫咗個乾炒牛河，睇下同香港有咩分別，基本上係無，呢個唔係貶義，而係想講好有香港水準，河粉條條分明，要讚嘅係食完唔會覺得成口油，之後查返，原來阿師傅係香港人，謎底經已解開！
我自己對到埗第一餐就相當滿意，滿意在於通常將平民嘢放入酒店或大商場都會變質，但呢度反而無，可能重點係佢無強行將平民菜高級化，忠於平民味道，從呢個角度去改良，最後你聽到個價錢都嚇一跳，一個小菜都係七、八十蚊，完全真係大排檔水平，可以話平靚正！呢條食街仲有好多驚喜，下回分解！