成日話「食得是福」，計我話不如從食得健康出發，爭取quota食多幾餐啦！今次介紹呢3間參加咗少鹽少糖食店計劃嘅地區特色小店，包括有摩洛哥風情餐廳，好啱開餐同時打卡；至於寵物友善休閒風Cafe，則可以帶埋愛寵喺戶外座位chill下；而港式風味嘅熟食中心西餐廳，就啱附近嘅上班族嘆個健康快餐。佢哋除左都有少鹽少糖健康版意粉外，又有沙律、burger等選擇，想輕食又得，求飽肚感都得呀！
黑松露野菌意大利飯
意式料理點少得意大利飯呢！師傅先用白酒、水將飯底煮好，再加入忌廉、巴馬臣芝士、洋蔥、蒜頭，注入奶香以及天然調味料嘅香氣。另外冬菇、本菇、黑松露嘅油同醬，則散發菌類嘅香氣同甜味，所以只需1/4茶匙鹽提味就得。
溫泉蛋卡邦尼意粉
卡邦尼意粉係人氣嘅意粉款式之一，師傅先炒洋蔥同蒜頭，令意粉沾滿食材香氣，然後落少少微鹹嘅巴馬臣芝士，咁就可以減少一半鹽都依然入味。最後放上溫泉蛋同少少蔥花，拌勻嚟食味道層次會更豐富。
安格斯牛肉漢堡
餐廳主張食burger要品嚐肉嘅原味，所以用純安格斯牛肉製作嘅漢堡扒，冇加鹽同糖調味。而布里歐麵包本身有奶油香氣，配合生菜同番茄嘅天然甜味，以及車打芝士嘅鹹味，入口鹹淡適中。配菜薯條同樣冇加鹽，再以沙律菜re-fresh味蕾，超滿足又食到食材原味。
⼤蝦⽜油果鮮柚沙律
輕食朋友鍾意嘅沙律，蔬果種類愈多，營養就愈均衡。好似呢道⼤蝦⽜油果鮮柚沙律，以西柚、金柚做主要味道，配埋牛油果、火箭菜、生菜、車厘茄等食材同少少柚子醋提味，唔落鹽同糖反而更突出蔬果嘅爽甜味道；加埋彈牙嘅白灼大蝦，口感更加豐富。
香蒜欖油海蝦意⼤利麵
呢道意粉嘅少鹽少糖版，係餐廳特別推介嘅菜式。師傅將蝦頭熬煮成醬汁，然後炒香蒜片、羅勒葉、辣椒同車厘茄，再加入意粉同炒，令香辣味道滲入麵條。而海蝦本身帶海水嘅鹽味，即使減少一半用鹽量都依然夠味。
吞拿⿂⽜油果蓋飯
Cafe重有西日風味料理㗎！吞拿⿂⽜油果蓋飯有一大球吞拿⿂蓉，拌勻牛油果、沙律菜、青瓜、青提子同紫洋蔥一齊食，可以利用蔬果嘅甜味代替糖。而為追求健康，味道微鹹嘅飛魚籽用量就減半，不過自家調配嘅海苔醬本身已帶鹹味，無需額外加鹽都夠味。另外跟餐嘅數款小菜會不時轉換款式，豐富成個蓋飯嘅味道。
圖：AndreaMa
番茄魚柳螺絲粉
番茄魚柳螺絲粉嘅烹調方法係先略炒新鮮番茄做底味，而魚柳則輕輕炸過，口感較為香脆，所以減少一半鹽同糖嘅用量都夠味。最後加埋新鮮沙律菜，以增加爽甜度。
蒜香蜆肉野菌意粉
除咗番茄味意粉，蒜香蜆肉野菌意粉都係唔錯嘅選擇。師傅先炒蒜頭同蘑菇，散發出嘅香氣可以提升蜆肉嘅鮮味，只需落1/4茶匙鹽同糖吊味。另外同樣伴上沙律菜，加添一份天然嘅甜味。
