高鐵正式通車，去遠啲嘅地方都要成十幾個鐘車程，食飽飽上路就最重要嘅，一於等開飯仔帶你睇下有咩食？高鐵總站大堂開設咗全港最大，佔地一萬八千呎嘅美食廣場堂前食坊，入面足足有七間餐廳，有齊港、中、日、韓、西同東南亞菜，真係唔知揀邊間好！

美食廣場提供自動點餐服務，操作簡單易明。首先禁開始點餐，然後再選擇餐廳，不過而家暫時只得霸嗎拉麵、龍城冰廳、百福麵家同南洋廚房4間開業。

如果有啲咩特別要求，仲可以喺部機到揀埋，例如開飯仔揀咗個原汁牛腩麵，就可以順便走埋蔥！

付款方法有4種，分別係八達通、信用卡、支付寶同微信支付，方便香港人同旅客。不過如果得現金嘅話，就要乖乖地排人手Counter啦～

買完記得拎走部機，當食物準備好果陣佢就會震動同響鬧，咁就可以跟返指示去拎野食啦。

食物方面開飯仔叫咗個百福麵家嘅原汁牛腩麵同南洋廚房嘅海南雞飯。原汁牛腩麵水準唔錯，牛腩軟腍之餘湯底濃郁，而且麵唔會好重梘水味。海南雞飯賣相就爭少少，不過雞肉啱啱好熟，都尚算滑身。

遲下剩底嘅3間餐廳大川小館、新沙同Hipster Burger都將會開業，選擇會愈來愈多架啦！

地址：尖沙咀柯士甸道西3號香港西九龍站抵港大堂B2層堂前食坊

文、相、片: Yanica