好多人（特別係女仔）成日都會話「我肥咗呀」、「我好攰呀」、「我好躁底呀」……嗯，上環最近開咗新店，專係針對呢啲人體發出嘅訊號而調配嘅養生飲品，有米水有茶飲，而且仲係由中醫設計㗎。

你有壓力我有壓力，冇嘢嘅，飲返杯「火龍果珍珠玫瑰茶」減下壓啦。呢杯嘅料好豐富下，火龍果同玫瑰花梗係唔少得啦，仲有蜂蜜、奇亞籽、磨碎咗嘅珠珠末等等，飲落有好香甜嘅果味之外，仲可以食到一粒粒嘅果肉同奇亞粉，都幾有口感。

成日話自己肥嘅朋友，可以揀由山楂、茉莉花同高山烏龍老茶調配而成嘅「山楂老茶」，駐店中醫師Cinci話有助減肥消脂呀。山楂味出得嚟，又唔使怕佢會好酸，反而係甜甜地仲帶有花香添。

至於米水系列，每杯都主要係由紅米、薏米、白米、黑芝麻同黑豆，按返唔同比例調配出嚟嘅，例如好似招牌米水咁，落得最多就係紅米，加埋白米、薏米煲成米水之後再蒒走比較硬身嘅紅米，加糖，最後喺面加上埋今年好興食嘅藜麥脆脆。呢杯係咁多杯飲品之中，較為清淡嘅一杯，米味好濃。

嚟緊天氣應該會開始凍，手凍腳凍嘅人最好就係飲返啲驅寒嘅嘢飲，「柚薑米水」係唔錯嘅選擇。第一啖就飲到好重嘅柚子味，慢慢微辣嘅薑味就會跟住滲出，過後就會飲得埋米香味，層次感都幾多。

米水同茶飲除咗熱飲，都可以揀凍飲。咦？中醫都畀人飲凍嘢？係呀，不過係冰搖凍飲。即係製作過程有加冰嘅，但經過店員勁搖之後啲冰就快速融化咗，飲嗰陣已經冇晒冰，唔凍㗎喇。講多樣嘢你知，男店員係做調酒師出身㗎，呢下冰搖嘅動作就係由調製cocktail嘅技術轉化過嚟。

舖頭另外仲有米水即沖包，同樣都係按返自己嘅體質同狀態揀嚟飲，畀人激親嘅有「順氣茶」（桂花、青皮、烏龍茶）、貪靚嘅有「還原靚靚茶」（山楂、薄荷葉、沱茶）等等。

CheckCheckCin 中醫。米水茶飲
地址：香港上環蘇杭街4-6號啟豐大廈地下