【新店直擊】京都百年抹茶老店今日登陸中環抹茶怪焙茶怪出動！（有片）

香港嘅抹茶控其實都幾幸福，無論係香港本土品牌，定日本過江龍代表都有唔少，而家又有多個日本品牌加入，講緊嘅就係喺京都宇治有超過150年歷史嘅辻利茶舗！辻利茶舗唔單止有抹茶，仲有焙茶！

拋下少少書包，講下少少歷史先。京都宇治嘅辻利一本店喺日本江戶時代末期萬延元年(1860年)開業，1923年喺北九州小倉開第一間辻利茶舖分店，到而家喺英國、加拿大、台灣、新加坡等地都有分店。今次終於開到嚟香港，位於IFC嘅茶舖今日正式開業，咁位抹茶控大大可以去潮聖打卡喇。

餐廳主要有幾款甜品同飲品：沙冰啦、軟雪糕啦、新地啦、卷蛋糕啦，仲有香港限定嘅窩夫。卷蛋糕有兩款口味，分別係抹茶同焙茶，蛋糕比較乾身，但係抹茶味好重好香濃，就連啲cream嘅抹茶味都好濃，仲有啲回甘味添。

新地亦都係可以揀雪糕嘅口味，由底數返到上面就分別係脆米層、抹茶／焙茶層、自家製紅豆蓉層，另外仲有啫喱、白玉丸子同茶盒形窩夫喺面，係幾多層幾多料嘅。

想淨係食軟雪糕都得，抹茶、牛奶、焙茶、抹茶溝牛奶扭紋4款味，隻牛奶雪糕係北海道8.0牛奶嚟，所以奶香味好重下。至於盛載雪糕嘅甜筒，就比較厚身，蛋香味濃，但好似開飯仔呢支焙茶甜筒咁，本身就咁食嘅焙茶味係好香嘅，不過夾埋一齊食就畀條筒搶咗啲味咯。

得香港先有嘅窩夫，主要材料同新地差唔多，不過就用咗個脆底窩夫墊底，另外再加多件卷蛋糕仔，基本上食一嚿就可以一次過食齊成間舖頭嘅甜品咁滯！

睇嚟IFC嘅3樓又會有條人龍出現喇，但呢間餐廳淨得外賣冇堂食位置㗎留意返。