夏天食雪糕冬天打邊爐，咁春天食乜好呢？新派和風西餐啱唔啱？呢間日式西餐廳嘅尖沙咀分店最近啱啱完成大變身，唔單止裝修換上自然風格，打開Menu亦有驚喜：春日宇治抹茶甜品、西式自家製烏冬，同清新輕食等等，睇下有無屬於你嘅「小確幸」？
 

夢見屋尖沙咀iSquare店啱啱完成變身，由室內設計到餐牌菜式都嚟個大變身，最吸引嘅一定係一系列獨家開賣嘅春日抹茶甜品。抹茶櫻花蛋糕有4層抹茶蛋糕夾櫻花味鮮忌廉，上面再加上抹茶朱古力、抹茶粉、櫻花粉、櫻花朱古力同鹽漬櫻花點綴。而抹茶日式草莓蛋糕就有非常搶眼嘅紅綠賣相。
 

自問係抹茶控嘅你仲可以留意抹茶泡芙同意式芝士抹茶杯，前者酥脆泡芙襯托柔滑抹茶吉士餡，後者以意式芝士軟忌廉嘅鬆軟濕潤配合抹茶嘅甘香微澀。
 

滿足甜品胃之前仲想食埋正餐嘅話，就可以一試佢地嘅自家製西式烏冬！烏冬口感彈牙有韌度，而且幼身烏冬同樣掛到西式醬汁，啖啖滋味。拿破侖蛋烏冬靈感嚟自拿破侖意粉，但喺底下加多層煎蛋更香口。而卡邦尼亞烏冬亦惹味富蛋香。
 

小清新輕食系列同樣吸引，日本雞蛋粟米沙律用透明田園風玻璃樽送上，一層層顏色豐富嘅食材記得畀相機先食！杏片蜂蜜汁芝士豆腐拌蒜香法包用咗廚師每日新鮮製作嘅芝士豆腐，所以每日限量供應，軟滑嘅芝士豆腐配香脆法包，再淋上蜂蜜，口感味道都有多重驚喜。

文：Cathy
 


開飯編輯推介：

1. 【專訪】日本人在香港 開餐廳最重要健康行先

2. 1月份好評餐廳十強

3. 2017亞洲50最佳餐廳 地區最佳餐廳全攻略

熱門文章推介：

1. 【一個人開飯】一個人喺大埔食乜好？

2. 【熟食中心尋寶】堅尼地城士美非路熟食中心

3. 【開飯教煮】網上人氣甜品店師傅示範朱古力慕斯

隨時接收最新資訊
讚好OpenRice專頁！