話元朗係平民搵食首選之地真係冇錯，啲嘢食好多時都係大大份，仲要價錢唔係貴。就好似近呢個月新開咗間米線舖咁，一碗招牌大碗米線，有成15款餸，都不過係68蚊，份量仲夠兩個人食添！

呢碗大米線，一碗有齊鮮味雞、雲吞、肥牛、脆腩、鮮魷、竹笙、豬潤、粉腸、牛丸、墨丸、鯪魚球、木耳、金菇、蘿蔔同豆卜，可以揀要米線或者紅薯粉。都好足料㗎，有成6、7嚿雞咁多，雞肉都好鮮嫩同滑口，脆腩都有6片，建議趁層皮仲係脆嗰陣，上枱就要盡快食咗先喇。 粉腸亦都好爽口。而紅薯粉都做到爽滑同煙韌嘅口感，唔會話太腍。重點係，碗粉真心大碗，兩個女仔食都未必食晒。

除咗一般汽水，舖頭仲有啲特飲。感覺健康啲嘅有青檸柚子蜜，都幾夠清甜呀。而想過下口癮嘅，就有紅豆涼粉冰，留意返，啲冰真係涼粉冰嚟！

米の線
地址：元朗鳳攸南街3號好順景大廈29號舖